Dje, Presidenti i Rusisë, Vladimir Putin, deklaroi se Bashkimi Sovjetik ua impononte me forcë vullnetin e vet vendeve të Evropës Lindore pas Luftës së Dytë Botërore, dhe se sipas tij të njëjtën gjë po tentojnë të bëjnë sot edhe Shtetet e Bashkuara të Amerikës me pjesën tjetër të botës.
Këtë deklaratë ai e bëri gjatë bashkëbisedimit të gjatë vjetor televiziv me bashkëkombasit e tij. Veç të tjerash, Putin bëri thirrje për unitet kombëtar si dhe parashikoi se vendi është duke e kaluar krizën ekonomike në të cilën u fut vitin e fundit për shkak të sanksioneve të perëndimit. Sipas tij, rikuperimi do të ndodhë brenda dy viteve të ardhshme. Në një performancë prej rreth 4 orësh, Putin iu përgjigj pyetjeve nga më të ndryshmet duke filluar nga ato për klonet, stacionet hapësinore e deri tek pyetjet për qentë, raketat dhe sigurisht gjeopolitikën.
Ai mbrojti vendimin e fundit të Kremlinit për të hequr ndalimin e shitjes së raketave të mbrojtjes ajrore për Iranin dhe akuzoi Kievin që po krijon një “tragjedi” në lindje të Ukrainës me bllokadën ekonomike ndaj Moskës, pikërisht në zonat separatiste. Lideri rus, që dikur e ka quajtur shpërbërjen e Bashkimt Sovjetik si “katastrofën më të madhe gjeopolitike të shekullit”, tha se vendi i tij nuk kishte armiq dhe se ai vetë ishte i gatshëm të bashkëpunonte me perëndimin. Por nga ana tjetër, e akuzoi Washingtonin se po i trajtonte shtetet e tjera si “vasalë” dhe jo si aleatë potencialë dhe, këtë e bëri duke e krahasuar situatën me periudhën e Bashkimit Sovjetik.
“Pas Luftës së Dytë Botërore Bashkimi Sovjetik tentoi që t’u impononte me forcë vullnetin shumë vendeve të Evropës Lindore. Na duhet ta pranojmë këtë. Dhe nga kjo nuk vjen asgjë e mirë”. Më pas ai shtoi:” Mendoj se amerikanët po sillen sot në të njëjtën mënyrë pra po përpiqen që t’ua imponojnë modelin e tyre githë botës. Por edhe ata do të dështojnë”. Sipas Putinit respekti i përbashkët është ai që do të rifreskojë marrëdhëniet me vendet perendimore të dëmtuara pë shkak të krizës në Ukrainë.
Përgatiti Dori Daka – /tesheshi.com/
