Kryetari i ri i bashkisë së Tiranës, Erion Veliaj ka zgjedhur që të marrë autobuzin në ditën e parë të punës. Ai është parë duke pritur autobuzin dhe qytetarët kanë bërë edhe fotografi të tij, ndërsa udhëtonte drejt Bashkisë. Nuk dihet nëse Veliaj do të shkojë përditë në punë me mjetet e transportit publik, por duket se ka zgjedhur që ditën e parë të japë shembull për bashkëqytetarët.
Puna e tij e parë në institucion ishte rregullim i orës në kullën e Sahatit, e cila kishte ngecur në vend prej kohësh. Këtë veprim e bëri të ditur vetë në Twitter ku shkroi:”Kryeqytetit s’mund ‘t’i ngecë ora”. Një punë e vogël si ditë e parë”, duke falenderuar edhe mjeshtër Johanin. Puna e dytë pas marrjes së detyrës ishte shkarkimi i Florenc Hoxhës, kreut problematik të INUV-it.
Burime nga bashkia thonë se në vend të Hoxhës, detyrën e merr Skerdi Drenova, si drejtori i ri i Inspektoratit Ndërtimor Urbanistik Vendor.
Skerdi Drenova është me profesion inxhinier dhe ka punuar prej vitesh në Top Channel.
Emërime të tjera priten shumë shpejt në bashki, thonë burimet, ai më i afërti emërimi i Arli Naskës, në postin e drejtorit në Drejtorinë e Përgjithshme të Tatimeve Tiranë. /tesheshi.com/
