Sipas hulumtimit të Qendrës për Edukim Qytetar (CGO), 40 për qind e të rinjve planifikojnë të largohen nga Mali i Zi, tha të hënën Nikola Obradoviç, duke e përshkruar atë si shqetësuese.
Ai tha për Televizionin e Malit të Zi se fakti që ky vend ballkanik është në krye të renditjes për sa i përket viteve në të cilat të rinjtë jetojnë me prindërit e tyre duhet të ketë pasoja.
“Shpresoj se në të ardhmen do të krijojmë një sërë masash për të zgjidhur problemin e largimit të të rinjve nga vendi”, tha Obradoviç.
Analisti ekonomik Igor Gavran, paralajmëroi se qëllimi i të rinjve për t’u larguar nga vendi paraqet probleme të mëdha ekonomike në të ardhmen.
Ai tha se kjo do të çonte në mungesë të fuqisë punëtore dhe rrjedhimisht më pak investime të huaja.
Gavran thotë se tashmë po ndihen pasojat ekonomike të ikjes së të rinjve në rajon.
“Ajo që mund të presim është që me kushte më të vështira jetese për të rinjtë dhe një synim më i madh për të emigruar, do të ketë gjithnjë e më pak fuqi punëtore në të ardhmen”, tha Gavran. /tesheshi.com/
