Nga Ylli Pata
Mazhoranca arrin më në fund të bëjë 84 vota në Kuvend pas më shumë se dy muajsh ftohjeje.
Kjo u arrit pikërisht në buxhetin e shtetit për vitin 2016, i cili u votua me 84 vota, ndërsa dy ndryshimet në kode dhe atë të akcizave e votuan pro 85 deputetë.
Po çfarë ndodhi që Ilir Meta lëshoi pe në seancën më të rëndësishme për mazhorancën, siç ishte ajo e buxhetit?
Mos vallë gjërat shkojnë vaj mes PS-së dhe LSI-së, por që ishin mediat ata që shpikën furtunën?
Këtu nuk ka asgjë të re pasi ka qenë vetë kreu i Kuvendit që kërkonte ndryshime në qeveri në mënyrë të herëpashershme.
Madje eksponentë të mazhorancës, siç ishte ministri aktual i Drejtësisë, Ylli Manjani akuzoi PS-në për hiç më shumë e hiç më pak sesa për “korrupsion politik”.
Por gjithçka ndryshoi si me magji vetëm pas intervistës së Koço Kokëdhimës në emisionin e Ylli Rakipit, Të paekspozuarit.
“Kumbara” i koalicionit mes PS-së dhe LSI-së në vitin 2012 lëshoi një frazë të koduar që duket se ishte ajo që priste Ilir Meta nga njeriu që dërgon mesazhet nga Rama tek kreu i LSI-së.
Koço Kokëdhima tha hapur se “do të votoja një qeveri me Ilir Metën kryeministër në vitin 2017”, duke përvijuar këtu paktin që e kërkon kreu i LSI-së prej kohësh.
Pikërisht, duke fryrë papushim partinë e tij nga 4% deri në 10% ai synon të shkojë në shifrën e 20% duke marrë me vete edhe përkrahjen e të ashtuquajturve “senatorë” të PS-së, me shpresën se një ditë ai do të ribëhet edhe një herë kryeministër siç ka qenë në vitin 1999-2002.
Me deklaratën e Kokëdhimës bëhej qartë se Edi Rama do të largohet, siç edhe ka premtuar në disa intervista, e se nuk do të qëndrojë gjatë në krye të vendit.
Por Meta natyrisht që nuk i beson kujt kollaj, aq më pak Ramës me të cilin ka shumë histori të tilla ku për hir të ambicies kanë thyer fjalë e besë, e çmos tjetër.
Qartazi, dhënia e “izmës” për votat e LSI-së, ishte një sinjal pas fjalëve të mira të Koços.
Por përpara është reforma në Drejtësi, “bomba” e vërtetë ku kreu i Kuvendit shikon armiq ngado, si te Edi Rama ashtu edhe te Lulzim Basha…
/tesheshi.com/
