Historiani dhe ish-kryediplomati Paskal Milo tha se ishte rast i rrallë ai që një president i huaj shkon e takon Baba Mondin, siç bëri Isaac Hercog pak ditë më parë gjatë një vizite në Tiranë.
Edhe për Milon, mundet që pas idesë së shtetit të bektashinjve mund të fshihet Izraeli.
“E gjithë kjo patjetër që ka qenë një arsye pse presidenti i Izraelit në vizitën që bëri në Tiranë, bëri një takim të posaçëm me Baba Mondin.
Nuk ka ndodhur herët e tjera që kryetarë shtetesh dhe qeverive që të shkojnë dhe të takojnë Kryegjyshin Botëror. Nuk di të ketë ndodhur ndonjëherë, nuk ka qenë asnjëherë pjesë e protokollit”, arsyetoi Paskal Milo.
Ai shkoi më tej kur tha se “Izraeli patjetër që është i interesuar për shkak të armiqësisë tradicionale me botën arabo-myslimane që dihet. Është i interesuar që komunitet myslimane të mos kenë unitet. Nëse do kishte unitet, gjithnjë është në dëm të tij”.
Për Paskal Milon, shteti sovran bektashi i paralajmëruar nga Rama, nuk ka gjasë të mos jetë një lojë e madhe. “E shoh jo aq të lidhur drejtpërsëdrejti vetëm me Izraelin, nuk e besoj. Duhet të jetë një qasje dhe lojë me përmasa shumë më të gjëra, ku Izraeli mund të ketë pjesën e vet të lojës, por nuk është vetëm”. /tesheshi.com/
