Incidentet në protestën e opozitës, ku përveç skenave të zjarrit në bunker patën si lejtmotiv dhe ca pak thyerje xhamash, flakë dhe mjete të forta ndaj Kryeministrisë dhe dy ministrive, u dënuan publikisht nga SHBA-ja, BE-ja, Gjermania, Parlamenti Europian etj., të cilët dolën me deklarata të plota dhe publike.
Por ajo që ka rënë në sy prej të martës është “fshehja” e aleatit kryesor të qeverisë, Lëvizjes Socialiste për Integrim.
Asnjë nga eksponentët e LSI-së nuk ka dalë në një deklaratë për shtyp pas protestës, gjë që përbën një çudi politike në vend.
Gjatë aferës CCEZ, LSI nuk pushonte në sulmet ndaj Lulzim Bashës duke i përmendur afera e mëkate dhe duke mbushur ekranet e TV-ve.
Por që nga 8 dhjetori, Ilir Meta nuk i ka rënë telefonit të asnjë prej bashkëpunëtorëve të tij të dalin publikisht të thonë qëndrimin e LSI-së për protestën dhe incidentet.
Por këtu ka edhe një fakt tjetër që duhet analizuar, madje me hollësi: Lulzim Basha, i vetmi në fjalime, foli për dyshen Rama-Meta, një refren i opozitës që prej muajsh; ama nga pjesëmarrësit në miting pati një performancë tjetër.
Në qendër të protestës pati vetëm një dordolec të karikaturuar me portretin e Ramës, foto të kryeministrit që u dogjën publikisht duke dhënë mesazhin se kjo opozitë synon të djegë karrierën e Edi Ramës; dhe siç e tha Basha ta “shporrë” qeverinë e drejtuar prej liderit socialist.
Po Ilir Meta pse u kursye nga përkrahësit e zjarrtë të opozitës, të cilët vetëm pak kohë më parë e shikonin kreun e Kuvendit si “e keqja e madhe”?!
Deklarata apo analiza nuk pati vërtet, por heshtja e të dyja palëve është një lëvizje politike e koduar, që çon në një emërues të përbashkët.
Sali Berisha ka kundërshtuar ashpër reformën në drejtësi në Parlament, përkatësisht draftin e hartuar, siç tha ambasadori Lu, nga “SHBA-ja dhe BE-ja”.
Kundër kësaj reforme, ministri aktual i drejtësisë, Ylli Manjani, përpara se të marrë postin ka firmosur një shkresë drejtuar Komisionit të Venecias, me anë të së cilës kundërshton thuajse të gjithë draftin e ndërkombëtarve.
Ambasadori Dolald Lu tha se kundër reformës në drejtësi janë deputetët kriminelë dhe ministrat e korruptuar.
Realisht kush janë këta?! Fjalëkryq i vështirë…
Më të vështirë e bën ligjërimi hakërryes i munguar i PD-së ndaj Metës gjatë protestës, e po ashtu heshtja e LSI-së dhe kreut të saj ndaj dhunës dhe piromanisë së protestuesve të opozitës atë të martë me tym e flakë, edhe politike.
Por, paraprakisht seç ka diçka prej thënies popullore “mishin ta ha, por kockën ta ruaj” në gjithë këtë mesele PD-LSI.
/tesheshi.com/
