Namibia, vendi i shkretëtirës afrikane, një nga më të prekurit nga ngrohja globale, dëshiron të mbulojë nevojat e veta duke prodhuar energji diellore dhe madje ta eksportojë atë në vitin 2030, duke ndihmuar kështu në dekarbonizimin e Evropës përmes prodhimit të hidrogjenit dhe amoniakut, raporton AFP.
“Ambicia është që të bëhet një inkubator industrial i karburanteve sintetike nga burimet e rinovueshme duke filluar të prodhojë energji diellore, më pas hidrogjen të gjelbër dhe amoniak të dekarbonizuar”, tha James Mnyupe, këshilltar ekonomik i presidentit Namibian.
Udhëheqësit namibianë erdhën në Evropë për të “ofruar diellin e tyre të jashtëzakonshëm”, tha Mnyupe në Roterdam, ku mori pjesë në Sallonin Botëror të Hidrogjenit dhe prezantoi strategjinë e tij të zhvillimit në Paris.
Vendi i Afrikës së Jugut dëshiron të përshtatet në objektivat energjetike të vendosura nga Bashkimi Evropian në fillim të kësaj jave për t’u çliruar nga varësia prej gazit rus.
Nëse BE-ja dëshiron të prodhojë 10 milionë tonë hidrogjen nga burime të rinovueshme deri në vitin 2030, ajo po llogarit në 10 milionë tonë importe për të zëvendësuar qymyrin, naftën dhe gazin në disa sektorë industrialë dhe në transport.
“BE e kupton që nuk mund të prodhojë 20 milionë tonë hidrogjen në Evropë, kjo është e pamundur, nuk kemi diell të mjaftueshëm dhe nuk kemi erë të mjaftueshme. Kjo është arsyeja pse ne do të kemi nevojë për një partner në Afrikë”, tha Jorgo Chatzimarkakis, Sekretari i Përgjithshëm i Hydrogen Europe.
BE-ja po mbështet në “Partneritetin BE-Afrikë” në hidrogjen për të reduktuar përdorimin e gazit, për të dekarbonizuar (reduktuar CO2) në industri, duke filluar nga portet e mëdha ku janë të përqendruara aktivitetet e konsumit të gazit natyror (për metalurgjinë, industrinë kimike dhe të tjera).
Në nëntor, Namibia filloi aktivitetet duke zgjedhur një operator për njësinë e saj të parë të prodhimit të energjisë diellore. Ajo zgjodhi një konsorcium të Hyphen të përbërë nga Fondi Ndërkombëtar i Investimeve (Nicholas Holdings) dhe grupi gjerman i energjisë Enertrag. Ai termocentral pritet të prodhojë 5,000 MW deri në vitin 2026 në vendndodhjen Tsau Khaeb.
E gjithë kjo është e arritshme, natyrisht, me kusht që Namibia të tërheqë mjaftueshëm investime nga kompanitë evropiane.
Nëse Namibia arrin vetë-mjaftueshmërinë në prodhimin e energjisë elektrike, “ajo mund të bëhet një eksportuese”, thotë Mnyupe.
“Sot ne importojmë midis 60 dhe 70 për qind të energjisë elektrike, kryesisht nga Afrika e Jugut,” dhe vetë-mjaftueshmëria do të ishte “hapi i parë drejt emancipimit ekonomik”.
Mnyupe hedh poshtë kritikat për “neokolonializmin” kur bëhet fjalë për forma të tilla të partneritetit euro-mesdhetar.
“Mund t’ju duket si neokolonializmi, por në fakt ne kemi mundësinë për ndryshim të rëndësishëm për emancipimin ekonomik të të gjithë Afrikës”, tha ai.
Ai tregon se duan ta bëjnë Namibinë tërheqëse për investime në mënyrë që sektori privat të guxojë të rrezikojë dhe të hyjë në një biznes të tillë.
Namibia do të shpallë “thirrjet e para për investime” në një samit në Davos më 22-26 maj, njoftoi Mnyupe.
Ai vëren se atdheu i tij është ndër vendet “më të prekura nga ngrohja globale”. Prandaj, të gjitha produktet do të vijnë nga “energjitë e rinovueshme”, ndaj dhe emetimet e CO2 do të jenë zero.
“Kemi zjarre, thatësirat po na vrasin dhe ne varemi nga hidrocentralet”, tha ai.
Kompanitë kineze “po trokasin tashmë në derën tonë dhe duan të përfshihen,” tha Mnyupe, duke njoftuar: “Ne jemi të gatshëm të punojmë me këdo që është i gatshëm të marrë pjesë në vizionin tonë të industrializimit të Namibisë.” /tesheshi.com/
