Presidenti i Republikës, Bujar Nishani dekretoi ndryshimet kushtetuese të miratuara nga Kuvendi javën e kaluar me 140 vota.
Tani, reforma në drejtësi do dy javë që të hyjë në fuqi.
Por Shtetet e Bashkuara të Amerikës dhe Bashkimi Europian, në veçanti Gjermania, kërkon që Kuvendi të miratojë ligjin e vettingut brenda korrikut dhe gjashtë ditët e tjera përpara shtatorit, kërkesë kjo qw ka hasur në rezistencë nga Partia Demokratike dhe LSI.
Kreu i grupit parlamentar të PD-së, Edi Paloka tha se nuk ka pse të mblidhet parlamenti me urgjencë. Ndërsa Petrit Vasili deklaroi se Kuvendi e ka mbyllur punën.
Por Ilir Meta nga SHBA, ku foli në një intervistë për Zërin e Amerikës tha se Kuvendi mund të mblidhet kur të dojë.
Shtetet e Bashkuara të Amerikës i kanë kërkuar PS-së që të miratojë pa vonesë ligjet shoqëruese të reformës, ndërkohë Berlini zyrtar ka qenë më i ashpër.
Ambasadorja e re gjermane në Tiranë, Susanne Schutz, ka qenë e prerë për këtë kërkesë kur tha se “festa tashmë ka mbaruar”.
“Ne e vlerësojmë shumë që Reforma në Drejtësi kaloi. Është një hap shumë i rëndësishëm i Shqipërisë në afrimin me Bashkimin Europian, por është shumë e rëndësishme që kjo reformë në drejtësi të mos mbetet vetëm në letër, por të implementohet. Unë shpresoj gjithashtu që 7 ligjet e rëndësishme, që në fakt duhet të kishin kaluar të enjten, do të miratohen shumë shpejt. Pa implementim, Reforma në Drejtësi nuk vlen shumë. Vendimi që do të merret nga Komisioni Europian, po ashtu edhe nga vendet anëtare, do të varet shumë se kur do të jenë hapat e parë të implementimit”.
Komisioni Europian bëri të ditur se nëse nuk miratohet të paktën ligji i vettingut, atëherë Shqipëria nuk do të përfitojë nga fondi i përcaktuar për ndihmën në drejtësi.
Këtu në fakt fle “kleçka”.
Siç e ka bërë të ditur tesheshi.com prej kohësh, procesi i vettingut thuajse ka mbaruar në pjesën e parë të vet dhe tani pret vetëm zbatimin, pra nisjen e operacionit të konkretizimit të “fshesës” së madhe të gjyqtareve dhe prokurorëve përpara se të instalohet organet e reja të gjyqësorit.
Por ajo që bën çudi është se forcat politike që votuan reformën sot nuk pranojnë të miratojnë ligjin e vettingut.
Në fakt ndonjë çudi e madhe nuk është, pasi ata vetë e kundërshtuan vettingutn në Kushtetutë e tani kërkojnë që ta vonojnë si ligj.
Por çështja është më e komplikuar se kaq. Ky vetting ka lidhje pikërisht me një operacion të madh që pritet të ndodhë në mes të shtatorit, pikërisht përpara vendimit të BE-së për hapjen e negociatave.
Vendim që padyshim pritet të firmoset nga një prokuror i cili ka kaluar sitën e vettingut. Flitet për një arrestim më shumë se të bujshëm…
/tesheshi.com/
