Deputeti Armando Subashi zyrtarizohet si kandidat i Partisë Socialiste për Bashkinë e Fierit. Subashi është zyrtarizuar pas takimit që kreu socialist Edi Rama ka zhvilluar me deputetët e Qarkut të Fierit.
Gjithashtu Fatos Tushe do të jetë kandidat për Bashkinë e Lushnjes.
Po ashtu është zyrtarizuar si kandidat për Bashkinë e Divjakës Fredi Kokoneshi, ndërsa për bashkitë e Roskovecit dhe Patosit kandidohen Majlinda Bufi dhe Rajmonda Balili. “Pas një konsultimi të gjerë me strukturat e PS në Fier dhe shoqërinë civile si dhe aktorët ekonomikë e social në këtë
qark u vendos që në tryezën e aleatëve të propozojmë këto emra.
Fillimisht kemi vendosur që të propozojmë dy zonja. znj Majlinda Bufi në bashkinë e Roskovecit, e cila është deputete dhe anëtare e komisonit parlamentar të Ekonomisë. Së dyti për bashkinë e Patosit propozojmë znj.Rajmonda Balilaj që është aktualisht kryetare e bashkisë Patos edhe ajo një eksperte e administrimit të mirë”. Burime brenda Partisë Socialiste konfirmojnë se kandidati për Bashkinë e Tiranës do të shpallet javën e ardhshme, ndërsa do të vijojnë akoma sondazhet në PS për kandidaturat.
Kryeministri Rama deri tani ka zhvilluar takim me deputetët e qarkut të Shkodrës, Dibrës, Kukësit, Durrësit, Elbasanit, Fierit. Pas përfundimit të këtyre takimeve janë konfirmuar si kandidatë edhe tre deputetë, Armando Subashi për Fierin, Majlinda Bufi për Roskovecin dhe Artur Bushi për Krujën
Pas takimit me Ramën, deputetja Mimoza Hafizi rikonfirmoi Keti Bazhdarin si kandidatura e PS për Bashkinë e Shkodrës. Ndërsa ministri Shkëlqim Cani ka dhënë emrat e kandidaturave për bashkitë në qarkun e Dibrës dhe Kukësit. Deputeti Blendi Klosi bëri të ditur emrat e PS për qarkun Durrës, duke konfirmuar Vangjush Dakon për Bashkinë e Durrësit, por edhe deputetin Artur Bushi për Krujën.
Deputeti Taulant Balla ka prentuar pas përfundimit të takimit me Ramën në PS edhe emrat e kandidatëve për bashkitë në qarkun e Elbasanit. Kështu që për Bashkinë e Elbasanit do të rikandidojë Qazim Sejdini, për Bashkinë e Librazhdit do të garojë Kastriot Gurra, për Bashkinë e Belshit kandidon Arif Tafani. Ndërsa për bashkinë e Gramshit Balla tha se vijojnë konsultimet.Sa i përket Bashkisë së Peqinit Balla theksoi se ende nuk ka një emër, pasi presin propozimin e PDIU-së.
Kryeministri Rama ka formuar një aleancë të gjerë partish për zgjedhjet e 21 qershorit ku PS dhe LSI kanë afruar pranë tyre edhe parti të spektrit të djathtë si PDIU apo FRD. Ndërsa në selinë rozë Rama është duke zhvilluar takime me deputetët e qarqeve duke konfirmuar edhe kandidaturat për Bashki të veçanta, burime brenda Partisë Socialiste bëjnë me dije se PDIU do të marrë Bashkitë e Konispolit, Rrogozhinës dhe Peqinit si pjesë e koalicionit.
