Mijëra protestues kanë shprehur zemëratën e tyre në ishullin japonez të Okinavës për praninë e madhe ushtarake amerikane.
Protestat janë nxitur nga përdhunimi dhe vrasja e një vendase 20-vjeçare në prill të këtij viti nga një ish-marins amerikan.
I punësuar si një punonjës civil, ish-marinsi është arrestuar për krimin e mësipërm, por akti i tij e ka rivënë në lëvizje kundërshtinë e vazhdueshme ndaj bazave ushtarake amerikane.
26.000 është numri i personelit ushtarak amerikan në Okinava, dhe ata e zhvillojnë veprimtarinë e tyre në baza që zënë një të pestën e ishullit. Këto baza ushtarake janë një pjesë kyç e aleancës së sigurisë mes SHBA-ve dhe Japonisë.
Prania amerikane në ishull zë fill në fundin e Luftës së Dytë Botërore, kur Okinava ishte vend beteje midis Japonisë dhe SHBA-ve. Okinava do të qëndronte për 27 vite nën pushtimin amerikan.
Protesta të ngjashme në Okinava ka patur dhe më herët në vite.
Mijëra vetë do të protestonin në vitin 1995 për përdhunimin e një 12-vjeçareje nga tre pjesëtarë të personelit amerikan. Në vitin 2010 do të dilnin në rrugë rreth 100.000 demonstrues për të ngritur zërin kundër ndërtimit të një baze të re në bregun verior të ishullit. /tesheshi.com/
