Ka ardhur më në fund dhe reagimi i parë ndërkombëtar ndaj protestës së opozitës në Tiranë me çadër ngrehur para Kryeministrisë duke kërkuar largimin e Ramës. Ka qenë pikërisht ai që pritej, eurodeputeti Knut Fleckenstein, i cili në prag të një vizite në Tiranë, ka shprehur objeksionet e tij ndaj protestës në fjalë, i intervistuar nga Dojçe Vele.
Diplomati europian ka thënë se opozita duhet ta japë prova se zgjedhjet mund të rrezikohen, meqë ky është dhe pretendimi kryesor për largimin e Ramës.
Pyet gazetarja e Dojçe Vele-s: Palët politike nuk e gjetën gjuhën e duhur për reformën zgjedhore para zgjedhjeve. Problemet e zgjedhjeve e kanë shoqëruar demokracinë në Shqipëri gjithmonë, por kësaj here opozita ngre shqetësim të madh blerjen e votave, sipas saj me paratë e drogës dhe krimit. Këto janë akuza shumë të rënda…
Përgjigjet Fleckenstein: Po, por kjo akuzë duhet të provohet fillimisht, e është gjithmonë e vështirë ta bësh këtë para zgjedhjeve. Por të gjithë ata që marrin pjesë në këto zgjedhje duhet ta dinë, se nëse këto zgjedhje nuk zhvillohen me korrektesë, atëherë do të ketë një problem për hapjen e negociatave me BE-në.
Të njëjtin qëndrim mbajti dhe kryeministri Rama një ditë më parë. Ai tha se opozita nuk kishte asnjë provë mbi pretendimet e saj që zgjedhjet janë të cenuara, duke iu referuar dhe mungesës së ndonjë raporti ndërkombëtar mbi këtë çështje.
Ndërkohë, eurodeputeti Fleckenstein tha se do bisedonte vetë me përfaqsues të opozitës sapo të mbërrinte në Tiranë.
“Opozita e ka gjithmonë një frikë të tillë para zgjedhjeve. Se sa realiste është kjo, për këtë dua të krijoj një përshtypje, kur të jem këto ditë në Shqipëri. Sigurisht do të takoj edhe përfaqësues të opozitës”, tha diplomati i Bruskelit i angazhuar së fundi me zhvillimet shqiptare. /tesheshi.com/
