Nga Blendi Gashi
Me intonimin e Himnit kombëtar dhe atij të Kosovës saktësisht në ora 14:20 filloi protesta e organizuar nga partitë opozitare kosovare AAK dhe NISMA edhe pse përkrahësit e tyre ishin mbledhur më herët në sheshin “Skëndërbeu”.
Ashtu edhe siç pritej, protesta ishte më e zbehtë pasi mungoj zëri i “zjarrtë” i aktivistëve të Lëvizjes Vetëvendosje, dhe natyrisht numri i protestuesve ishte më i vogël edhe pse drejtues të dy partive organizatore paralajmëronin gjatë gjithë kohës se protesta do të jetë më masivja e organizuar ndonjëherë në Kosovë edhe pa VV-në.
Herë pas here dëgjohej zëri i një grupi të studentëve, të cilët dalloheshin se ishin militant të AAK-së e brohoritnin “Me hajna, me hajna nuk ka shtet”, “Isa Hasha si Esat Pasha”, por këta zëra nuk ishin aq kumbues.
Se i mungoj “agresiviteti” protestës së sotme e dëshmojnë edhe disa foto të ralizuara nga portali tesheshi.com, ku shihet parulla të gjuajtura në tokë dhe të lëna tek tribuna ku ishin të vendosur mediat.
Edhe policia kishte marrë masa më të vogla, pasi nuk ka angazhuar Njësitet Speciale si në protestat e kaluara për të mbrojtur objektin e qeverisë e kuvendit. Gjithashtu mungonin edhe njerëzit që vëzhgonin protestën nga katet e larta të qeverisë, fenomen që ndodhi në protestën e 17 shkurtit.
76 vjeçari: Pa Vetëvendosje-n s’ka protesta masive
Hamdi Buzuku një 76-vjeçar nga fshati Tugjefc, i cili kishte dale në protestë tha për portalin tesheshi.com se nuk është i kënaqur që partitë opozitare janë ndarë.
“Unë jetoj në Prishtinë, jam nga një fshat në kufi me Serbinë. Dola me i ble do barna për vete dhe me shiku sa persona do të marrin pjesë në protestë. Shumë keq që janë nda. Nuk munden pa Vetëvendosje-n veç AAK-ja dhe NISMA me rrëzu qeverinë, s’ia kanë dalë së bashku , lëre më kështu të ndara”, – thotw i moshuari.
“A po e shihni? Shumë pak protestues ka në krahasim me protestat e kaluara ku ka marrë pjesë edhe Vetëvendosje. Unë jam për me rrëzu këtë qeveri, por po më duket se vështirë e kanë. Në momentin që i kanë largu shatorat që i vendosën opozita e kam ditë që më nuk ka kurgjo. Tri partitë duhet t’i lanë anash mospajtimet e të bashkohen nëse duan me rrëzu qeverinë. Kështu nuk kanë me ia arrit qëllimit, edhe pse një ditë do të rrëzohet qeveria por mund të shkojë kohë”, tha për tesheshi.com i moshuari Hamdi Buzuku.
85 vjeçari nga Rugova: Nuk i falim tokat
E veçanta e kësaj proteste ishte deklarimi i pronarëve të tokave të Rugovës dhe monologu i aktorit Çun Lajçi.
Marrja e fjalës nga plaku 85 vjeçar Zeqir Dreshaj nga Kuqishta e Rugovës bëri për një moment që turma protestuese të ndizej.
Ai ka nxitur ovacione me fjalimin e tij duke thënë se tokat e tyre janë nga Tivari deri në Ulqin.
Dreshaj duke mos u pajtuar me shënjimin e kufirit me Malin e Zi tha se nuk do të lejojnë që të marrin tokat e tyre.
“Kurrë nuk i lëshojmë tokat tona. Është tokë e jona”, tha 85-vjeçari Dreshaj.
Aktori Lajçi luan monolog
Protestuesve u është drejtuar edhe aktori Çun Lajçi i cili luajti një performancë me recitalin për gjeneralët.
Aktori Lajçi njihet për recitalet e tij që u ka kushtuar dëshmorëve të kombit. Ai është më origjinë nga Rugova.
Drejtuesit e AAK-së e NISMA-s kërkuan dorëheqjen e qeverisë dhe zgjedhje të reja.
Thelbi i deklaratave të drejtuesve të AAK-së ishte kundërshtimi dy marrëveshjeve, Asociacioni për Komunat Serbe dhe Demarkacioni me Malin e Zi. Konrektisht kësaj të fundit për çka thonin se Kosova nuk ka tokë për të falur dhe lëvizja e lire e qytetarëve nuk duhet kushtëzuar me faljen e tokës së shtetit.
Ata kanë thënë se zgjidhja e vetme e kësaj gjendjeje janë zgjedhjet e parakohshme përmes së cilave kanë thënë se qytetari do të jetë ai që do të qeveris me vendin.
Lideri i AAK-së, Ramush Haradinaj, gjatë fjalimit të tij para protestuesve, ka thënë se Kosova po përjeton trazira prej pushtetarëve të korruptuar që po e humbin shpresën qytetarëve.
Ai ka thënë se rreziku më i madh vjen prej fqinjëve dhe nga Qeveria e Kosovës.
“Kosova sot i ka dy rreziqe: E para është nga ndërhyrjet nga fqinjët dhe e dyta nga Qeveria”.
Haradinaj po ashtu ka kërkuar nga Qeveria e Kosovës që të jap dorëheqje dhe mandatin t’ia dozojë popullit.
Kurse, kryetari i partisë NISMA për Kosovën, Fatmir Limaj, ka thënë se qeveria aktuale e Kosovës po bënë pazare me interesat e vendit derisa po shkel kushtetutën.
Në fjalimin e tij para protestuesve, Limaj ka thënë se Qeveria e Isa Mustafës ka mashtruar qytetarët duke bërë pazare me rekomandimin për liberalizimin e vizave dhe me “Zajednicën”
“Ky është koalicion që ka shkelur kushtetutën. Që nga dita e parë kjo qeveri në vend se të punojë për ta ndryshuar gjendjen e Kosovës, ajo përpiqet që të mashtrojë dhe gënjejë qytetarët përmes pazareve. Mos harroni, në ditët që vijnë do të shihni se çfarë do të vijë nga ky koalicion. Ata po bëjnë pazar. Po marrin vizat dhe po japin tokë. Por ne nuk kemi tokë për të dhënë. Më vonë kanë me na thanë po e krijojmë ‘Zajednicën’ e po e formojmë ushtrinë”, ka thënë Limaj.
Ndryshe, pas përfundimit të fjalës nga ana e kreut të AAK-së Ramush Haradinaj protestuesit janë shpërndarë të qetë, derisa reshjet e shiut veç filluan./tesheshi.com/
