Ndërtesa futuristike e Parlamentit Europian në Strasburg duhet të përdoret si strehë për refugjatët, ka sugjeruar lideri i partisë së Gjelbër, Philippe Lamberts, sipas të cilit deputetët mund të zhvendosen në ndërtesën tjetër të parlamentit, në Bruksel.
Propozimet e tij janë në kuadër të planeve të reja për të rishpërndarë 160 mijë refugjatë në vendet e BE-së. Fluksi i refugjatëve ka shkaktuar krizë në bllokun e 28 vendeve anëtare.
“Ky parlament ku ne mblidhemi sot, përdoret vetëm 50 ditë në vit”, tha Lamberts ndërsa ligjvënësit debatonin për fjalimin e kreut të KE-së, Jean-Claude Juncker.
“Në 300 ditët e mbetura, 750 zyra të deputetëve, të gjitha me ngrohje e me dushe mbeten bosh dhe të papërdorura”, tha ai.
“Ne propozojmë që kjo ndërtesë e pajisur në mënyrë perfekte të përdoret si një strehë e përkohshme për refugjatët ndërsa ne punojmë në Bruksel”, shtoi ai.
Partia e Gjelbër është një kritike e ashpër e lëvizjeve të përmuajshme të deputetëve nga Brukseli në Strasburg, duke e cilësuar këtë zhvendosje të shtrenjtë dhe që dëmton mjedisin. /tesheshi.com/
