Mensur Krasniqi
Pas akuzave të partisë maqedonase në pushtet VMRO-DPMNE-së ndaj Prokurorisë speciale se gjatë hetimit të lëndëve kanë qasje selektive, kjo e fundit sot nëpërmjet një konference për medium ka demantuar çdo gjë. Sipas tyre Prokuroria speciale është institucion i pavarur dhe të gjitha procedurat që kanë ngre deri më tani janë bazuar nga bisedat e përgjimeve që kishte publikuar opozita maqedonase një vit më parë.
“Gjithmonë kemi material voluminoz para se të dalim dhe të publikojmë çfarëdo lëndë. Ne nuk kemi qasje selektive. Dua të potencoj se të gjitha procedurat që kemi ngre dhe të gjitha lëndët që i kemi publikuar janë bazuar në përgjimet e publikuara. Pavarësisht se nga cila parti politike vinë, nuk kemi qasje selektive ndaj të dyshuarve”, potencoi prokurorja Lençe Ristovska.
Prokurorja gjithashtu përmendi se ata ende e presin përgjigjen, nga presidenti Ivanov, në lidhje me atë se prej ku i ka marrë emrat e personave të falur, që janë nën hetime nga PSP-ja. Ristovska tha se dy kërkesa deri më tani janë dërguar në adresë të presidentit, njëra më 15.04.2016 dhe tjetra më 09.05.2016, ndërkaq Ivanov ende nuk ka dhënë përgjigje.
Kujtojmë se presidenti i shtetit maqedonas Gjorgje Ivanov para 1 muaji solli vendim për abolim të 56 personave që ndiqen për vepra penale nga Prokuroria Speciale, e që më pas i ndikuar nga kritikat e opinionit të gjërë dhe përfaqësuesve të komunitetit ndërkombëtar tërhoqi pjesërisht këtë vendim, vetëm për 22 persona që janë aktiv në politikë. Mirëpo siç theksuan nga Prokuroria speciale vazhdon të mbetet enigmë fakti se nga e ka kuptuar presidenti Ivanov se cilët ishin personat e dyshuar në listën e speciales. /tesheshi.com/
