Prokuroria e Kosovës ka zhvilluar hetime për personat e dyshuar se do të grijonin një grup të armatosur që përpara ngjarjes së rëndë të Kumanovës, ku u vranë 10 persona të grupimit, 5 policë dhe u plagosën 30 të tjerë. Në një njoftim për shtyp të Prokurorisë, theksohet se bastisjet e banesave kanë ndodhur në disa familje kosovare me arsyen e pjesëmarrjes se disa shtetasve të Kosovës në incidentin në Kumanovë.
Prokurori i Shtetit, respektivisht Prokuroria Speciale e Republikës së Kosovës, njofton opinionin e gjerë se prokuroria është në fazën hetimore të një rasti, për të cilin janë kryer bastisje nga Policia e Kosovës, më 15 maj 2015, kundër disa personave të dyshuar.
Veprimet e para hetimore, në këtë rast, kanë filluar para se të ndodhin ngjarjet e fundit në Maqedoni, për shkak të dyshimeve se disa persona kanë planifikuar kryerjen e disa veprave penale në vendin tonë, thuhet në reagimin e Prokurorisë së Shtetit.
Po ashtu Prokuroria Speciale e Republikës së Kosovës, pasi që për këtë rast, ka pranuar kërkesë së bashku me prova nga Policia e Kosovës i është drejtuar gjykatës kompetente me kërkesë për lëshimin e urdhrit për kontroll.
Ndërsa për sqarim të opinionit, në këtë rast mund të jenë të dyshuar persona të njëjtë, të cilët sipas informatave që Prokuroria i ka pranuar nga mediat, mund të kenë qenë të përfshirë në ngjarjet e ndodhura në Maqedoni.
Po ashtu ky veprim hetimor, i bazuar në ligj, është ndërmarrë duke vlerësuar rëndësinë për ruajtjen e rendit dhe sigurisë publike në vend, si dhe parandalimin e çfarëdo lloji të kryerjes së veprave penale.
Prokuroria Speciale e Republikës së Kosovës përderisa rastin e ka në fazë hetimore nuk mund të bëjë publike informata të tjera, mirëpo siguron opinionin se Prokurori i Shtetit, duke u bazuar në kompetencat dhe obligimet ligjore që ka, do të ndërmarrë të gjitha masat e nevojshme për parandalimin e të gjitha akteve të kundërligjshme në vend përfundon reagimi i Prokuroria Speciale drejtuar medieve./tesheshi.com
