Pesë prokurorëve shqiptarë të grupit antikorrupsion, do t’i shtohen dhe 6 prokurorë të huaj të cilët do të asistojnë vetëm në hartimit të akuzave të zyrtarëve të lartë, ndërkohë që Prokuroria e Përgjithshme do të bëjë ekzekutimin e arrestimeve.
Kjo është pohuar nga kreu i komisionit parlamentar të ligjeve Fatmir Xhafaj, por në fakt është bërë e ditur nga portali tesheshi.com që prej disa muajsh.
Bashkimi Europian ka ngarkuar misionin e tij EURALIUS që punon në Shqipëri që të gjejë profilin e prokurorëve që mund të përshtaten me merimangën shqiptare të korrupsionit.
Siç mësohet, do të jenë nga Spanja, Kroacia dhe Rumania njërëzit që do të asistojnë task-forcën e drejtuar nga Dritan Rreshka që do të përgatisë dosjet që do të kërcasin prangat e zyrtarëve të lartë shqiptarë.
Siç mësohet, janë mbi 400 dosje në shqyrtim, të cilat do të seleksionohen në një rreze të ngushtë dhe të arrihet në një rreze prej 200 dosjesh. Sipas një plani paraprak mësohet se në fazën e parë do të përfundojnë në pranga gati 100 zyrtarë e ish-funksionarë për abuzim me detyrën dhe marrje rryshfeti.
Këta funksionarë do të jenë kryesisht zyrtarë që janë marrë me tenderat, rryshfetin dhe depozitimin e parave publike, kryesisht nga prokurimet shtetërore. Kjo do të jetë dhe faza e parë.
Në krah të grupit të prokurorëve do të jetë dhe ILDKPKI-ja, e cila ka depozituar paditë e para ndaj tre deputetëve të Kuvendit dhe një gjyqtari shumë të rëndësishëm. Kështu Inspektorati ka paditur për fshejhe pasurie: Tom Doshin, Mark Frrokun, Arben Frrokun, si dhe kreun e Gjykatës së Apelit të Tiranës, Alaudin Malaj./tesheshi.com/
