Zyrtarizohet qeveria e Zoran Zaevit ku shqiptarët kanë 9 anëtarë qeverie, mes të cilëve dy zv.kryeministra nga BDI. Ndër postet kyçe që kanë marrë shqiptarët janë ministria e Drejtësisë, ajo e Ekonomisë dhe e Shëndetësise, por edhe e Qeverisjes lokale.
Emrat e BDI-së nuk kanë profil të lartë politik, por bie në sy që ndër ministrat shqiptarë figuron asistenti i ambasadorit amerikan në Shkup.
Ndërkaq, nga ana e ministrave të LSDM-së, Zaev ka zgjedhur ministër të Jashtëm diplomatin e karrierës që pati refuzuar të emërohet ambasador në Moskë.
Ja kush janë ministrat e rinj dhe jetëshkrimet e shkurtra të tyre.
Hazbi Lika, zëvendës-kryeministër për Sistem politik dhe marrëdhënie mes komuniteteve
Lika që nga viti 2009 nuk ka qenë aktiv as në parti e as në jetën politike. Ai më herët ka ushtruar postin e kryetarit të komunës së Tetovës. Në vitin 2003 ka qenë zëvendësministër i Brendshëm, periudhë që dallon për punësimin e policëve shqiptarë me libreza partiake.
Bujar Osmani, zëvendës-kryeministër për Euro-integrime.
Osmani është zëdhënës i BDI-së, ndërsa ka qenë ministër i Shëndetësisë.
Sadulla Duraku, ministër i Mjedisit jetësor dhe planifikimit hapësinor
Duraku është nënkryetari i BDI-së dhe njëherësh kryetar i komunës së Likovës. Paraprakisht, Duraku ka drejtuar ministrinë e Bujqësisë dy vite rresht.
Ramiz Merko, ministër pa portofol
Ramiz Merko ka qenë kryetar i Komunës së Strugës për dy mandate.
Kreshnik Bekteshi, ministër i Ekonomisë
32-vjeçari Bekteshi ka ushtruar funksionin e promotorit ekonomik në Bruksel dhe Bern.
Bylent Salihu, ministër i Drejtësisë
Salihu fillimisht ka qenë drejtor në NP “Komunale” në Vrapçisht, pastaj drejtor në Inspektoratin e Gjuetisë dhe Pylltarisë të Maqedonisë.
Propozimet e Aleancës për Shqiptarët janë:
Arben Taravari, ministër i Shëndetësisë
Taravari njihet si ish-kryetar i Bordit në Klinikën Universitare për Neurologji, profesor i neurologjisë dhe pediatrisë, anëtar i bordit të revistës mjekësore “Vox Medici” dhe revistës ndërkombëtare mjekësore “Medikus”.
Suhejl Fazliu, ministër i Vetëqeverisjes lokale
Fazliu ishte konsulent i pavarur në E-qeverinë, shërbime për vetëqeverisje lokale për më shumë shtete, konsulent i pavarur në E-Tregti, shërbime për ndërmarrje publike për më shumë shtete; konsulent i pavarur për teknologji informatike.
Oliver Spasovski, ministër i Brendshëm
Spasovski ishte ministër i Punëve të Brendshme në Qeverinë teknike pas Marrëveshjes së Përzhinës, deputet, këshilltar dhe sekretar në Komunën e Kumanovës.
Radmilla Sheqerinska, ministre e Mbrojtjes
Shekerinska përveç si ish-kryetare e partisë dhe ish-deputete në shumë mandate, ka qenë në qeverisjen socialdemokrate para vitit 2006 si zëvendës-kryeministre për Integrimin europian, kur Maqedonia hyri në fazën e parë të marrëveshjes për Stabilizim dhe Asocim me BE-në.
Nikolla Dimitrov, ministër i Jashtëm
Dimitrov njihet si negociator për kontestin e emrit; ish- ambasador në SHBA dhe Holandë, përfaqësues i Maqedonisë në Organizatën për ndalim të armëve kimike, bashkëpërfaqësues i Maqedonisë në Gjykatën Ndërkombëtare të Drejtësisë, ish-shef i kabinetit për siguri kombëtare, ish zv/ministër i punëve të jashtme, por ai njihet më shumë si diplomati që ka refuzuar emërimin e tij si ambasador në Rusi.
Dragan Tevdovski, ministër i Financave
Tevdovski është doktor i Shkencave ekonomike dhe punon si profesor në Fakultetin ekonomik në Universitetin “Shën Kirili dhe Metodi”..
Renata Deskoska, Ministre e Arsimit.
Deskovska është profesoreshë universitare në Fakultetin Juridik, ish -deputete, ish- këshilltare për çështje kushtetuese dhe juridike në Kabinetin e Presidentit, eksperte e UNDP-së për Kornizë ligjore dhe dialog ndër-etnik, anëtare e komisionit ad hoc për hetimin e ngjarjeve të 24 dhjetorit të vitit 2012.
Goran Sugarevski, ministër për Transport dhe Lidhje
Ish- deputeti, Sugareski në përbërjen e kaluar parlamentare ishte koorditor i grupit parlamentar të LSDM-së.
Ljupço Nikollovski, ministër i Bujqësisë, Pylltarisë dhe Ujësjellësit
Nikollovski ka qenë sekretar i përgjithshëm i LSDM-së dhe ish -zëvendës-ministër plotësues për Bujqësi, Pylltari dhe Ujësjellës në Qeverinë teknike, ish-deputet dhe avokat.
Milla Carova, ministre për Punë dhe Politikë Sociale
Carovska ka qenë këshilltare speciale e Ministrit për Punë dhe Politikë Sociale dhe kryetare e Komisionit për Punë dhe Politikë Sociale të LSDM-së.
Damjan Mançevski, ministër i Shoqërisë Informatike
Mançevski ishte nënkryetar i LSDM-së, deputet, shef i shtabit zgjedhor, anëtar në Këshillin e Qytetit të Shkupit dhe udhëheqës i Sektorit për të rinj në Agjencinë për të rinj dhe sport. Ka punuar si inxhinier në Agjencinë për komunikime elektronike.
Robert Allagjozovski, ministër i Кulturës
Allagjozovskji është eseist, kritik letrar dhe përkthyes.
Edmond Ademi, ministër pa portofol
Ademi ka qenë këshilltar i Ministrit të Punëve të Brendshme, drejtor i përgjithshëm në Institutin për hulumtime politike dhe ekonomike, ish-asistent i ambasadorit në SHBA (2007-2009), ish-specialist për media, diplomaci publike në ambasadën e SHBA-së në Shkup.
Koço Angjushev, ministër pa portofol
Angjushev është profesor në Fakultetin Makinerik pranë Universitetit “Shën Kirili dhe Metodi”.
Robert Popovski, ministër pa portofol
Popovski ka qenë kryeredaktor i programit informativ në Tv Sitel dhe ish- kryeredaktor dhe drejtor programues në Televizionin Kanal 5.
/tesheshi.com/
