Largimi i Gordana Jankullovkës nga kabineti qeveritar ka qenë veprimi më i lehtë për Kryeministrin e Maqedonisë, njeriun e “fortë” të VRMO-DPMNE-së.
40 vjeçarja e diplomuar për jurisprudencë, që flet shqipen mjaftueshëm, por që ka gëzuar punë të mira sapo ka dalë nga bankat e shkollës, i ka hyrë politikës pasi ka kaluar fazat e besnikërisë ndaj shefit të saj, Nikola Gruevski.
Jankulovska që ka mbrojtur një diplomë pasuniversitare në Britaninë e Madhe, ngjiti shkallët e karrierës politike, pikërisht pasi punoi për 2 vjet në stafin e ngushtë të Ministrit të Financave, ku shërbeu edhe shefe e kabinetit të Ministrit. Po kush ishte ky ministër?
Nikolla Gruevski, Kryeministri aktual, i cili njeriun e afërt në dikasterin e parave, e angazhoi në opozitën e tronditur nga lufta e vitit 2001 dhe humbja e zgjedhjeve. Me një lëvizje të shkurtër, Gruevski në vitin 2004, bën atë që kishte bërë 4 vjet më parë, e emëron Jankulovskën Sekretare të Përgjithshme të VRMO-DPMNE, edhe pse karriera e saj në këtë parti fillonte nga ky post. Në zgjedhjet e 2006, kur VRMO-DPMNE rierdhi në pushtet krahu i djathtë i Nikolla Gruevskit nuk do të lëvizte, edhe pse bëhej fjalë për një ministri super të rëndësishme ku zakonisht kishin qeverisur “burra të fortë”. Siç u vërejt më pas, ministrja e Brendshme, më shumë se një zë i fortë, ishte një dorë e zgjatur e Kryeministrit në radhët e forcave të rendit dhe shërbimit sekret.
Në një postim, të shkruar në orët e para të mëngjesit të sotëm në faqen e saj në Facebook, ministrja e larguar falënderon kreun e qeverisë dhe stavin që ka punuar. Një kortezi, që nuk fsheh aspak ndonjë lëvizje politike të mundshme. Loja me Kumanovën ishte aq e rëndë, sa nuk mund të mbajë vetëm largimin e një ministreje. Gruevski e dinte, por luajti bllofin ngaqë siç duket rrugëdaljet i kishte të pakta…
Afera e përgjimeve e nxori Jankullovskën si njeriun më të ekspozuar në të gjitha lëvizjet. Të gjithë, ministra, deputetë, dhe madje edhe zyrtarë të rankut të tretë flisnin me Jankullovskën Ajo jepte urdhëra, shpërndante fletë fotimi dhe bënte ndere, por natyrisht të gjithë e dinin se kishin të bënin me lidhjen indirekte me kreun e qeverisë. Besnikëria shpërblehet… /tesheshi.com/
/tesheshi.com/
