Ylli Pata
Ai ishte i pari që “bekoi” para prillit të 2013-ës bashkimin mes Edi Ramës dhe Ilir Metës. Si përfaqësues i socialistëve europianë, Gianni Pitella foli në emër të grupit të tij politik, duke kërkuar unifikimin e së majtës shqiptare.
Sot, dy vite pas bashkimit, situata është shumë pranë rikthimit në të shkuarën. Edi Rama dhe Ilir Meta janë në pikën më të keqe të marrëdhënieve mes tyre.
Pikërisht në këtë “ditë të keqe”, Giani Pitella u rikthye në Tiranë në një mision ende të panjohur, por 
duke u shprehur sërish se, “Shqipëria ka nevojë për liderë si Rama e Meta”. Dhe sipas burimeve brenda së majtës, eurodeputeti italian po zhvillon realisht një proces negocimi mes PS-së dhe LSI-së, e, sipas gjasave, ka marrë edhe tagrin e duhur nga ana e krerëve të Partisë Socialiste Europiane.
Po kush është eurodeputeti italian që realisht është “kumbari” i pajtimit mes Ramës dhe Metës?
Gianni Pitella për nga profesioni është mjek kirurg, i specializuar për autopsi, por shumë pak e ka ushtruar atë. Me origjinë nga rajoni i Bazilikatës, Pitella është djali i një politikani të njohur, Domenico Pitella-s, i cili ka qenë senator i së majtës italiane.
Pitella është një nga figurat më të njohura përfaqësuese të jugut të varfër italian. Gjithë karrierën e tij politike e ka zhvilluar në Parlamentin Europian, ku ka krijuar profilin e një eurodeputeti veteran, ndaj prej dy legjislaturash është zëvendëspresident i Parlamentit Europian dhe nënkryetar i grupit socialist në PE.
Pitella, duke qenë dhe përfaqësues i së majtës italiane, vendit fqinj dhe që ka nën “kujdestari” Shqipërinë, ka dhënë dorën e “bekimit” për aleancën Rama-Meta. Ai i solli në ceremoninë e bujshme në Shkodër të gjithë krerët e të majtëve të Ballkanit, duke ngjizur kështu një aleancë që pritej të sillte një ndryshim thelbësor dhe të shpejtë në Shqipëri.
Por kjo nuk ndodhi. Siç mësohet, gjermanët nuk e kanë përkrahur bashkimin, madje kanë ndërhyrë që të krijojnë një fizionomi tjetër politike në vend. Knut Fleckenstein, një europarlamentar socialdemokrat gjerman është prej dy vitesh raportuesi për Shqipërinë në PE, duke qenë në realitet njeriu që vendos gjithçka. Ai erdhi para një jave në Tiranë, dhe dha një mesazh ndryshe, duke kërkuar jo bashkim, por dekriminalizim dhe nisjen e hetimeve të mëdha për korrupsion. Atij iu bënë shumë nderime nga përfaqësuesit e së majtës, ku më spikatësi ishte ai i “Çelësit të Tiranës”.
Ndaj dhe misioni i Gianni Pitella-s një javë më pas është pjesë e një procesi që duket se po gatuhet në Bruksel për të marrë një vendim final për aleancën Rama-Meta. Duke qenë se PS-ja është pjesë e PSE-së, dhe Rama është një nga drejtuesit e socialistëve europianë, ashtu siç ndodhi në 2013-ën, PSE-ja do të japë “verdiktin” apo opinionin e saj për vazhdimin e koalicionit të majtë. Të paktën si qëndrim politik.
Megjithatë, profesioni i Pitella-s, si mjek i specializuar për autopsi, nuk të jep shumë shpresë për misionin e tij të ri… /tesheshi.com/
