Daniel Serwer, një analist i njohur politik amerikan, si dhe profesor në Universitetin John Hopkins, është intervistuar nga e përditshmja serbe Blic. Ndër shumë pyetje të tjera, gazetari ka dashur të dijë prej tij nëse Bashkimi Europian do të kërkojë nga Serbia ta njohë Kosovën. Pyetje së cilës Serwer i është përgjigjur kësisoj:
“Mendoj se po. Janë 23 shtete që e kanë njohur Kosovën, dhe ato do të kërkojnë të paktën anëtarësimin e Kosovës në OKB; por mbase jo njohjen bilaterale dhe normalizimin e marrëdhënieve diplomatike me përfaqësues në nivel ambasadorësh.
Jemi të lumtur që serbët kanë mbetur në Kosovë. Kishat dhe manastiret janë të mbrojtura. Dëshirojmë që serbët të trajtohen mirë, por, sa i përket çështjes së statusit të Kosovës, ajo është punë e kryer.
Serbia nuk do t’i dëshironte të gjithë shqiptarët si qytetarë të saj. A me të vërtetë do të dëshironit të keni shqiptarë në përfaqësuesen tuaj të futbollit? Të gjithë e dimë se kjo do të përbënte një problem të madh.
Edhe pse për pjesën tjetër të botës kjo çështje është e kryer, në politikën serbe është vështirë që kjo çështje të thyhet. Por do të vijë koha kur dikush në Serbi të marrë kurajo dhe të pranojë se çështja e Kosovës është punë e mbaruar.
Natyrisht, është shumë legjitime brenga e serbëve në Serbi për mirëqenien e bashkëkombasve të tyre në Kosovë” /tesheshi.com/
