Projekti për ekspozitën e përhershme të dëshmive për krime lufte në Kosovë, i iniciuar nga ish-drejtoresha e Kulturës në komunën e Prishtinës, Saranda Bugujevci, po shkon drejt përfundimit.
Përmes një komunikate për media bëhet e ditur se komuna e Prishtinës nënshkroi sot memorandum mirëkuptimin me ambasadën zvicerane dhe Fondin për të Drejtën Humanitare, përmes së cilit në bibliotekën “Hivzi Sylejmani” do të arkivohen materialet që dëshmojnë për krimet e luftës në Kosovë.
“Aty do të ketë audio-incizime, video-incizime, si dhe materiale të tjera të shtypura edhe nga proceset gjyqësore në Hagë. Kjo ekspozitë do të jetë e qasshme për të gjithë ata që janë të interesuar të dinë më shumë detaje për krimet e luftës në Kosovë”, thuhet në komunikatë./tesheshi.com/
