Një zyrtar i lartë saudit tha se ai dyshonte raportin e Agjencisë Amerikane të Inteligjencës – CIA mbi implikimin e Princit të Kurorës Mohammed bin Salman, në vrasjen e gazetarit Jamal Khashoggi, duke shtuar se nuk mund të llogarisin si të besueshme këtë agjenci në dhënien e të tilla konkluzioneve.
“CIA nuk është standardi më i lartë i saktësisë në vlerësimin e situatës. Shembuj të kësaj janë të shumta”, u tha gazetarëve në Abu Dhabi, Princi Turki Al-Faisal, një zyrtar i lartë në familjen mbretërore.
Më konkretisht, ai iu referuar konkluzioneve të CIA-s se në vitin 2003 se Iraku posedon armë kimike, ku pas pushtimit amerikan rezultoi të mos ishte e vërtetë.
“Ishte shembulli më i qartë i një vlerësimi të pasaktë dhe të gabuar, gjë që çoi në një luftë të vërtetë me mijëra viktima”, tha ai.
Ditë më parë, CIA arriti në përfundimin se Princi Mohammed kishte urdhëruar operacionin e vrasjes së Khashoggi, të botuar së pari nga Washington Post.
Ndërsa Princi Turki i tha AP se vrasja e Khashoggi ishte një “incident i papranueshëm”.
“Ne të gjithë duhet të merremi me të. Kjo është diçka që ne duhet të përballemi dhe ne po përballemi me të.”
Princi Mohammed ka ndërmarrë një turne në disa vende arabe, ku fillimisht është ndaluar në Emiratet e Bashkuara, për të vijuar më pas me Bahreinin dhe Tunizië, para se të udhëtojë për në Argjentinë më 30 nëntor, në samitin e G20-ës, ku do të takohet me udhëheqësit e botës.
Presidentët Trump dhe Erdogan, do të jenë gjithashtu në samit.
I ndjeri Khashoggi punoi për Princin Turki si zëdhënës i Ambasadës Saudite në Londër dhe më vonë në Uashington. /tesheshi.com/
