Kryeministri britanik, David Cameron pritet të njoftojë planet për rritjen e numrit të refugjatëve që do të lejohen në vend. Numri shtesë i refugjatëve pritet të plotësohet me njerëz që vijnë nga kampet e OKB-së në kufijtë e Sirisë dhe jo nga personat që tashmë, ndodhen në Europë.
Edhe pse ende nuk ka një numër të saktë të atyre që do të pranohen, Cameron tha më herët se Britania do të vijonte të pranonte mijëra të tillë. Kryeministri që është vendosur nën presion për të bërë më shumë për adresimin e krizës së refugjatëve, pritet ta bëjë njoftimin nga Spanja pas takimit me politikanët atje.
Takimi me homologët spanjollë e portugezë në fakt ka të bëjë me reformimin e dëshiruar të BE-së.
Apeli për Britaninë që të bëjë më shumë për refugjatët u intensifikua sidomos pas publikimit të fotografisë së një djali të vogël sirian të mbytur në det ndërsa largohej me anije, e që ujërat e nxorrën në brigjet turke.
Cameron tha se si baba ndjehej i prekur nga imazhi, por argumentoi se pranimi i më shumë njerëzve nuk ishte një vendim I thjeshtë. Por tashmë duket se qëndrimi i tij ka ndryshuar mes presionit të madh të publikut dhe figurave politike. /tesheshi.com/
