Presidentja e Kroacisë Kolinda Grabar-Kitaroviç ka lëshuar alarmin se Ballkani gjendet para një rreziku rus.
Kreu i shtetit kroat, ish-numri dy i NATO-s, ka pasur të njëjtin qëndrim si Edi Rama. Siç bën të ditur tema.al, Grabar-Kitaroviç, gjatë një vizite në Austri, ka deklaruar për të përditshmen “Die Presse” se në rajon është shënuar një kthim prapa dhe ka përmendur si shembull Maqedoninë.
Presidentja kroate tha se nga njëra anë e vëren rritjen e ndikimit rus në aspektin ekonomik, gjeopolitik dhe në fushën e sigurisë dhe nga ana tjetër lodhjen e Bashkimit Europian nga zgjerimi.
“Deklarata e presidentit të Komisionit Europian Jean-Claude Juncker se asnjë vend nuk do të anëtarësohet gjatë mandatit të tij i përgjigjet fakteve për shkaqe teknike, sepse nuk mjafton koha. Por ky konstatim keqkuptues e ka dekurajuar mbarë rajonin”, tha Kolinda Grabar-Kitarovic. Presidentja kroate nënvizoi se është e shqetësuar me ngjarjet e fundit në Maqedoni, një vend që, sipas saj, një kohë të gjatë është lënë anash dhe tani gjendet në vetëizolim.
Presidentja kroate tha se Ballkani mund të arrijë paqen e përhershme, stabilitetin dhe prosperitetin vetëm brenda BE-së dhe NATO-s. Në pyetjen e gazetës “Die Presse” se përse Kroacia nuk është e gatshme të pranojë më shumë refugjatë sipas një çelësi të BE-së për shpërndarjen e tyre, Grabar-Kitarovic u arsyetua kështu: “Ne vetëm po kërkojmë mirëkuptim për rrethanat tona. Për momentin ne nuk kemi strehimore të duhura. Papunësia te ne është 18 për qind, te të rinjtë madje 46 për qind”.
/tesheshi.com/
