Ish-burgu famëkeq i Spaçit në Mirditë ka shërbyer si emblema e përkujtimit në vigjilje të 25-vjetorit të rënies së komunizmit.
Duke marrë shkas nga kjo ditë, presidenti Bujar Nishani, i shoqëruar edhe nga ish-të burgosur dhe të përndjekur politikë, zhvilloi një vizitë në ambientet e atyshme, duke dekoruar disa ish-të burgosurve që sot nuk jetojnë më si: si Pal Zefi, Dervish Bejko, Skënder Daja, Hajri Pashaj, Mershim Vlashaj dhe Xhelal Koprencka.
Kreu i shtetit tha se ende nuk është kërkuar falje për krimet e komunizmit prej atyre që i shkaktuan ato, edhe pse viktimat nga ana e tyre kanë u kanë ofruar falje.
Nga Spaçi, presidenti Nishani tha gjithashtu se duhet kumtuar për drejtësi, gjetjen e viktimave të zhdukura, hapjen e dosjeve, pastrimin e shoqërisë dhe politikës nga kriminelët e dikurshëm dhe veglat e tyre, si dhe dënimin ligjërisht dhe sidomos moralisht të shkaktarëve të këtyre vuajtjeve dhe jo ngjalljen e tyre.
Gjithashtu, ai kërkoi që Spaçi të shndërrohet në muzeun e memories, vend peligrinazhi, si dhe të jetë pjesë e kurikulave shkollore; kjo e fundit sipas tij si një mënyrë që e keqja jo thjesht të mos harrohet, por që të mos përsëritet kurrë më. /tesheshi.com/
