Pak ditë pasi Reuven Rivlin, presidenti i Izraelit, dënoi veprimin e ekstremistëve hebrenj që i vunë flakën një shtëpie palestineze dhe dogjën një foshnje tetëmbëdhjetëmuajshe, është shfaqur rishtas, e këtë herë me një propozim për zgjidhjen e konfliktit mes izraelitëve dhe palestinezëve.
Në një raport për një të përditshme izraelite, presidenti izraelit ka paraqitur vizionin e tij mbi zgjidhjen e konfliktit me palestinezët, duke propozuar një konfederatë izraelito-palestineze pa kufij.
Rivlin është shprehur shkoqur, “Nuk shoh ndonjë mundësi paqeje nëse nuk do të ketë kufij të hapur midis nesh dhe fqinjëve tanë.”
Pas një analize të rritjes së numrit të sulmeve nga kolonët hebrenj ndaj palestinezëve, presidenti izraelit shpreh mendimin se duhet krijuar një konfederatë pa kufij për të arritur paqen mes Izraelit dhe Palestinës.
Ai i është kthyer edhe njëherë ngjarjes makabre të zjarrvënies nga ekstremistët hebrenj, “Terrori është terror, dhe nuk ka rëndësi se ç’nacionaliteti i përket. Ekziston një vështirësi në luftimin e terrorit të kryer nga grupet e hebrenjve radikalë. Eshtë terror nga brenda, dhe është e vështirë t’i sjellësh para drejtësisë këta kryerës të akteve terroriste. Na nevojitet të krijojmë instrumente për ta luftuar këtë lloj terrorizmi.”
I pyetur më tej nëse ligjërimi racist mund të çojë në një tjetër vrasje politike, duke aluduar dhe për të, presidenti u përgjigj pa u shmangur, “Gjithçka është e mundur. Sot kemi ata të cilët kanë iluzione se një shtet hebre dhe demokratik është demokratik vetëm për hebrenjtë.” /tesheshi.com/
