Ndërsa vëmendja e opinionit botëror është përqendruar në takimin dyditor të BE-së në Bruksel, Francois Hollande, presidenti i Francës, ka deklaruar se nevojitet një marrëveshje globale.
“Çfarë unë dua është një marrëveshje globale me Turqinë, kjo është e nevojshme.” Për të vijuar më pas, “Turqia po pret një numër të madh refugjatësh, dhe ka rol thelbësor që ne të mund të kthejmë një numër emigrantësh nga Greqia.”
Por Hollande ka kujtuar gjithashtu se marrëveshja duhet të përfshijë Greqinë, sepse ajo nuk mund t’ia dalë ta përballojë valën e refugjatëve nëse nuk ndihmohet.
Presidenti francez e ka bërë të qartë se nuk do ta pranojë një marrëveshje mbi krizën e refugjatëve që nuk e përfshin edhe ndihmën financiare për Greqinë.
Bisedimet në Bruksel do të vijojnë dhe sot, me praninë dhe të kryeministrit turk. Gjithsesi, nuk dihet ende nëse marrëveshja do të finalizohet. Një paralajmërim se bisedimet do të kenë vështirësinë e tyre e bëri dhe kancelarja gjermane. Angela Merkel tha se, “negociatat me Turqinë nuk do të jenë shumë të lehta”. /tesheshi.com/
