Duzina emigrantësh të mbyllur në një qendër ndalimi në verilindje të Çekisë e që po prisnin deportimin, përgjithësisht nga Afganistani, Pakistani e Iraku, u përpoqën këtë fundjavë të merrnin arratinë që andej. E tëra kjo solli reagimin e policisë, e cila përdori gazin lotsjellës për t’i frenuar.
Ndërkaq, presidenti çek, Milos Zeman, nuk ka ngurruar t’u përgjigjet ashpër të mbeturve në mëshirë të fatit. Në një intervistë të botuar në faqen elektronike të së përditshmes Blesk, Zeman ka përdorur një gjuhë cinike ndaj emigrantëve, “Askush nuk ju ftoi ju këtu. Por tashmë jeni këtu. Ju duhet të respektoni normat tona, siç i respektojmë ne normat kur shkojmë në vendin tuaj. Përndryshe, nëse nuk u pëlqen, ikni!”
Presidenti ka vijuar më tej në intervistë me pikëpamjen e tij mbi mënyrën e zgjidhjes së çështjes, “Ne mund t’i ndihmojmë më mirë këta njerëz në territorin e tyre. Duhet të punojmë për t’i rrëzuar këto regjime terroriste, veçanërisht ISIL-in, për të eliminuar arsyen kryesore pse ata e lënë vendin e tyre.”
Çekia nuk është një vend që i pret krahëhapur emigrantët. Këtë e tregon dhe një studim i publikuar të premten e shkuar nga Qendra për Analizë dhe Studime Empirike, sipas të cilit 70 për qind e çekëve ngurrojnë t’i mirëpresin refugjatët nga Afrika dhe Lindja e Mesme.
Ndërsa Çekia është ende në nivelin e retorikës së ashpër, një tjetër vend, Hungaria, ka marrë një masë më ekstreme, duke nisur ndërtimin e një muri në kufi me Serbinë, me synimin për ta ndaluar tërësisht vërshimin e emigrantëve nga vendi ballkanik. /tesheshi.com/
