Një grua nga Siria lindi në kushte shumë të vështira dhe në fshatin Miratoc të Preshevës, pa ardhur ende tenda urgjencë nga spitali ushtarak i Nishit. Gjithçka shkoi mirë fatmirësisht, pasi gruaja u ndihmua nga mjekët e Qendrës Shëndetësore të Preshevës.
Mbi 5 mijë refugjatë nga Lindja e Mesme, shumica gra në gjendje të rëndë janë vendosur në një kamp të improvizuar në fshatin Miratoc të Preshevës. Gjithçka është spontane dhe nuk ka asnjë kamping të gatshëm si nga qeveria serbe ashtu edhe nga UNCHR-ja.
Siç bën të ditur e përditshmja serbe “Danas”, në një reportazh nga Miratoci, refugjatët të dërrmuar kanë vendosur në një fushë të fshatit, çadrat e kampingut që i mbanin me vete nga rruga e gjatë. Të ardhurit janë nga Siria, Iraku, Afganistani, që kanë mbërritur me trena, autobusë dhe taksi nga Gjevgjelia në Preshevë, pasi autoritetet maqedonase zhbllokuan kalimin kufitar me Greqinë.
Ky fluks i refugjatëve, i cili është një rekord në muajin e fundit në territorin e Preshevës, ka çuar në pothuajse një gjendje të jashtëzakonshme në qytet. Refugjatët janë në rrugë, në restorante, qendra e pritjes ndodhet nën rrethim të vazhdueshëm. Ka probleme serioze me higjenën dhe furnizimin me ujë të pijshëm.
Në mesin e refugjatëve ndodhet një numër i madh grash, fëmijësh e të moshuar. Mjekët e qendrës shëndetësore të Preshevës dhe Kryqit të Kuq theksojnë se pjesë dërrmuese e grave shtatzëna ndodhen në situatë traumatike depressive ç’ka rrezikon seriozisht shëndetin e tyre dhe të foshnjave që presin të lindin.
Ata janë të rraskapitura pas një ndalesë dy-ditore në kufirin greko-maqedonas në Gjevgjeli. Aktualisht ekzistojnë nëntë tenda të mëdha, të cilat janë marrë nga qendra humanitare ruse-serbe në Nish. Refugjatët ngritën çadrat që ata bartin me vete.
Në Preshevë ishte edhe ministri i Mbrojtjes i Serbisë Bratislav Gashiç, i cili tha se Beogradi ka struktura të mjaftueshme për të përballuar gjendjen, por panorama në terren është krejt ndryshe. “Emergjente është furnizimi me ujë të pijshëm, ndërkohë që Maqedonia nuk na lajmëroi për situatën që ne të përgatiteshim”, tha Gashiç.
Një ekip nga spitali ushtarak i Nishit ndodhet që ditën e djeshme në kamp për t’i shërbyer refugjatëve dhe kanë sjellë me vete edhe dy tenda shërbimi intensiv të gatshëm edhe për lindje meqë ka gra shtatzëna. Lodhja, nervozizmi, etja dhe uria i ka tronditur ata, shumë prej të cilëve u bie të fikët vazhdimisht. Në fushën e Miratovcit ku është ngritur kampi, nuk ka vend për më shumë, ndërkohë që autoritetet bëjnë të ditur se mund të mbërrijnë sot edhe 4 mijë vetë.
Ata ndihmuan ekipet e saj të menjëhershëm mjekësor. Përfaqësuesit e organizatave humanitare, Kryqi i Kuq, UNHCR-ja, kanë lëshuar alarmin e një emergjence humanitare pasi mund të shpërthejnë epidemi të ndryshme.
/tesheshi.com/
