Nga Blendi Gashi
Politika kosovare për afër dy vite është në një komë ku përfaqësues të pozitës e opozitës përdorin një fjalor aq fyes dhe banal mes vete thuajse janë armiq me shekuj e jo të thirrur të punojnë për mirëqenien e qytetarëve.
Aq thellë ka shkuar përçarja sa fare nuk e kanë problem të bëjnë me gisht kush është patriot e kush tradhëtar, derisa preokupimi kryesor i tyre mbeten temat e mëdha, e sigurisht jo varfëria e papunësia e madhe.
Ndërsa përmes akuzave të ndërsjella tentojnë të fitojnë elektorat, kur bëhet fjalë për marrjen e meritave të gjithë ia shtrijnë dorën njëri-tjetrit, qoftë edhe padashje.
Kjo ka ndodhur të premten me rastin e përurimit të fabrikës së ujësjellësit në Shkabaj, ku krerët e politikës kosovare janë bërë “një” për të prerë shiritin dhe më për t’ia atribuar meritat vetës.
Dhe “lufta” u zhvillua më shumë mes ish-kryetarit të Prishtinës, njëherit kryeministrit Isa Mustafa dhe kreut aktual të Prishtinës Shpend Ahmeti, por që anash nuk mbeti as PDK-ja e Kadri Veselit.
Duke qenë se furnizimi me ujë 24 orë ka është një nga premtimet e bëra gjatë fushatës zgjedhore, kryetari Ahmeti tha se “komua që drejton është angazhuar dhe ka punuar tash e sa kohë që prishtinasit të kenë ujë pandërprerë, dhe se po e zgjidhin një problem jetik për qytetarët e kryeqytetit”.
Për të marrë merita për projektin në fjalë u paraqit edhe kryeministri Isa Mustafa i cili ia kujtoi Ahmetit se projekti është iniciuar në kohën kur ai ka qenë kryetar i Prishtinës.
“Unë veçmas jam i kënaqur, sepse edhe mua më ka rënë hise para pesë viteve kur e kemi përgatitur dokumentacionin për këtë investim që të nënshkruajmë, që të përcaktojmë strukturën e financimit”, tha Mustafa.
Por nuk kishte si të mos marrë merita për projektin edhe PDK-ja ku në përurim përveç kryetarit Veseli prezent ishte dhe minsitri Blerand Stavileci. Ky i fundit e ka lidhur projektin me emrin e programit të PDK-së, “Misioni i ri”, që ishte në fushatën e fundit zgjedhore.
“Misioni ynë për ujë dhe energji të bollshme po realizohet”, ka shkruar Stavileci në Facebook, duke e quajtur fabrikën, kryevepër të sektorit të ujërave me të cilën do të zgjidhet problemi i furnizimit me ujë për komunat e Prishtinës, Fushë Kosovës, Obiliqit, Graçanicës, Lipjanit dhe Podujevës.
Ndryshe zyrtarë të LDK-së e VV-së përmes në postimeve në Facebook kanë bërë garë se kush e ndërtoi fabrikën.
Vlora Dumoshi, shefe e kabinetit të Mustafës, krejt meritat për ndërtimin e fabrikës ia ka atribuar shefit të saj, duke thënë se “objekti u përurua nga njeriu (Mustafa) që vuri themelet e jetësimit të tij”.
Kurse, sekretari i VV-së Dardan Molliqaj ka shkruar në Facebook se “Vetëvendosje” ua përmirëson jetën qytetarëve duke u siguruar ujë 24 orë”.
