Komisioneri i Zgjerimit i BE-së, pasuesi i Johanes Hahn në këtë detyrë, hungarezi Oliver Varhelyi, tha se negociatat e pranimit me Shqipërinë dhe Maqedoninë Veriore duhet të fillojnë në pranverë.
Ministrat e jashtëm të BE u takuan me krerët e diplomacisë së Shkupit dhe Tiranës përpara një takimi të Këshillit të BE në Bruksel.
“Debati ka qenë inkurajues. Duket sikur ne do të jemi në gjendje të ecim përpara dhe të korrigjojmë gabimin e bërë në tetor. Ne duhet të fillojmë negociatat e pranimit me të dy vendet në pranverë,” tha Varhelyi.
Vendet anëtare të BE-së nuk mund të bien dakord për hapjen e bisedimeve të pranimit me Shqipërinë dhe Maqedoninë Veriore në tetor.
Ndërkohë, Franca, vendi që diktoi “Jo”-në, ka moderuar qëndrimin për procesin e pranimit në BE, me kusht që të reformojë vetë procesin.
Komisioni i ri Evropian duhet të dalë me një propozim për një metodologji të re për procesin e pranimit deri në fund të janarit.
Për këtë, ministri Cakaj u shpreh duke shkruar në FB: “Sot në Bruksel filluam ditën me një mëngjes pune me gjithë Ministrat e Jashtëm të BE-së për të diskutuar hapat që duhet të ndërmerren bashkarisht për të mundësuar çeljen e negociatave me Shqipërinë dhe Maqedoninë e Veriut
Nënvizuam faktin se Shqipëria ka përmbushur të gjitha kushtet teknike për të filluar bisedimet për anëtarësim në BE dhe theksuam rëndësinë madhore të perspektivës evropiane për të ndihmuar tutje procesin e demokratizimit dhe stabilizimit të Ballkanit Perëndimor në përgjithësi.
Menjëherë pas miratimit të metodologjisë së re për negociim, pritet të fillojë një dinamikë e re politike në funksion të hapjes së negociatave për anëtarësim me Shqipërinë dhe Maqedoninë e Veriut”. /tesheshi.com/
