Fitorja e Çelsit ndaj një kundërshtari si Mançester Siti mori më tepër vlerë pas asaj përmbysjeje të Totenhemit në minutat e fundit të lojës ndaj Suonsi Sitit. Çelsi ruan kështu diferencën prej shtatë pikësh me Totenhemin në kryesimin e kampionatit anglez, duke iu afruar akoma më shumë fitimit të titullit.
Skuadra e Çelsit la pas atë humbje të papritur të së shtunës ndaj Kristëll Pallasit, për të fituar ndaj një kundërshtari të tillë si Mançester Siti në javën e 31-të të Premier League-s.
“Duhet të jemi të kënaqur, sepse mundëm një ekip të fortë, ekipin më të mirë të ligës. Eshtë diçka e madhe të fitosh këtë lloj ndeshjeje në këtë kohë,” ishin fjalët e Antonio Conte-s pas takimit.
Lojtari më i mirë i 90 minutave, Eden Hazard, qe shënuesi i dy golave në fitoren 2-1; për miqtë do të barazonte përkohësisht në pjesën e parë Aguero.
Çelsi shkoi në kuotën e 72 pikëve; 65 pikë ka Totenhemi i vendit të dytë.
Pikërisht Totenhemi do të bënte një përmbysje fantastike mbrëmjen e shkuar. Humbiste 1-0 në fushën e Suonsi Siti gjer në minutën e 88-të, kur papritur lojtarët e tij shënojnë tre herë në fare pak kohë. Në të 88-tën minutë barazon Dele Alli, në të 91-tën realizon Heung-Min Son, dhe në të 94-tën vulos fitoren 1-3 Eriksen me golin e tij.
Njëkohësisht me këto takime, nuk duhet harruar kthimi te fitorja e Arsenalit, që mposhti 3-0 Uest Hemin.
Në të zakonshmet lëkundje të këtij sezoni, Liverpuli barazoi 2-2 me Bornmëthin. /tesheshi.com/
