Ka nisur një ofensivë e re e Ilir Metës ndaj Saimir Tahirit.
Media pranë kreut të LSI-së po trazojnë opinionin me plane për ndryshime qeverie në shtator, të cilat i japin Ministrinë e Brendshme partisë së Metës, ndërsa Spatak Ngjelës i japin dikasterin e Drejtësisë që ka aktualisht e drejton Ylli Manjani.
Ndërkaq, në anën tjetër, një tjetër armik i Tahirit dhe mik i IlirMetës, Koço Kokëdhima ka ndërmarrë një sulm frontal ndaj ministrit të Brendshëm. Dy ditë më parë ka pasur një përplasje publike në distancë mes tyre, pra Kokëdhimës dhe Tahirit.
Gazeta e Kokëdhimës, ka botuar një raport mbi hashashin në Shqipëri, më shumë se një javë pasi tesheshi.com publikoi të dhënat e një dokumenti gjerman.
Specialja e botuar në gazetën Shekulli kishte shtuar edhe zona që sipas Ministrisë së Brendshme nuk janë në hartën e kanabisit.
Dhe dikasteri që drejton Tahiri përgatiti dhe shpërndau një deklaratë të ashpër kundër Kokëdhimës, ku e akuzonte për publikimin e një raporti “inekzistent”.
Po çfarë fshihet pas këtij sulmi dhe cili është qëllimi që synon të arrihet?!
Ndoshta edhe një ribërje e qeverisë?!
Por, Edi Rama nuk do ta lëshonte kaq kollaj Saimir Tahirin, aq më pak para zgjedhjeve ku aseti i policisë është edhe një nga armët më të fuqishme të kryeministrit për të prezantuar suksesin e “Rilindjes”.
Burime brenda mazhorancës bëjnë të ditur për tesheshi.com, se ky sulm frontal është pjesë e një presioni, por jo synim përfundimtar për të hequr qafe Tahirin.
Maksimumi duan të “tulatin” operacionin e madh dhe sekret të Edi Ramës që po bën në Ministrinë e Brendshme.
Dhe këtë po e përgatit me një nga armiqtë e Kokëdhimës, të cilin e ka graduar në fillim të këtij viti, duke acaruar shumë dhe fatalisht “Pashain e Jugut”.
Operacioni është në dorë të Stefan Çipës, ish-kryebashkiakun e Sarandës, zv.ministrit të Brendshëm, i cili që nga dimri i këtij viti po përgatit atë që sipas Edi Ramës do të sjellë përmbysjen elektorale në Shqipëri, gjë që nuk ishte e mundur në vitin 2013.
Ministria e Brendshme ka nisur dhe thuajse e ka përmbyllur regjistrimin e saktë dhe total të të gjithë emigrantëve që ndodhen jashtë Shqipërisë.
Dhe sipas të dhënave, ky do të jetë kontigjenti që Edi Rama do ta sjellë për të votuar në zgjedhjet e vitit 2017 me shpresën që do t’i japë Ramës diferencën e “artë”.
Eksperimentin e parë Rama e ka kryer në dy qarqe të Shqipërisë në 23 qershor 2013.
Pikërisht në Tiranë dhe në Gjirokastër u zbatuan projektet pilot që sollën për Partinë Socialiste një numër shumë të madh votash.
Në Gjirokastër, Erjon Veliaj dhe Arben Ahmetaj që ishin kandidatët kryesorë për deputetë sollën një numër të madh emigrantësh nga Greqia për të votuar, të cilën bënë diferencën dhe e lanë Partinë Demokratike me një deputet.
LSI-ja përfitoi vetëm në sajë të formulës së koalicionit dhe nuk mori numrin e mjaftueshëm, qoftë edhe për një parlamentar.
Ndërkohë, e njëjta gjë ndodhi edhe në Tiranë, ku i deleguar ishte Pandeli Majko dhe, bashkë me Saimir Tahirin arritën të sjellin një numër të madh emigrantësh për të votuar.
Edhe në këtë qark diferenca ishte e madhe. PS-ja la për herë të parë PD-në poshtë me disa pikë, madje pati teprica sa për të bërë deputet edhe Spartak Brahon e LSI-së në listat e saj.
Ndërkohë nga listat e LSI-së doli vetë Ilir Meta së bashku me Luan Ramën, të cilët përfituan padyshim nga skema e koalicionit dhe jo nga numri i votave që mori e vetme LSI-ja.
Pikërisht për këtë Meta ndërmorri një ofensivë në zgjedhjet lokale të 21 qershorit 2015 për të dyfishuar numrin e votave për partinë e tij.
Ilir Meta kërkon siç duket që të jetë bashkëhartuesi i database-s së emigrantëve në mënyrë që të njihet me të dhënat për të përpunuar kontingjentin.
Sipas të gjitha gjasave, kreu i LSI-së kërkon që të emërojë Drejtorin e Gjendjes Civile nga partia e tij, i cili të kontrollojë regjistrin themeltar të zgjedhësve.
Pikërisht emigrantët do të bëjnë diferencën në zgjedhjen e vitit të ardhshëm.
PD-ja dhe LSI-ja nuk do të pranojnë për të futur në Kodin Zgjedhor votimin e mërgimtarëve në konsullatat apo ambasadat shqiptare jashtë vendit, ndaj dhe PS-ja ka përgatitur një plan për të sjellë sa më shumë.
Është pikërisht plani që ka zbatuar Milo Gjukanoviçi me referendumin e pavarësisë në vitin 1996, ku mërgimtarët, kryesisht nga SHBA dhe Kanadaja, pjesa më e madhe shqiptare i siguruan kuotën e vështirë 55% për të fituar pavarësinë nga Serbia. /tesheshi.com/
