Ndërsa të gjithë merreshin me atletet e Edi Ramës dhe me mungesën teknike të tij në foton familjare të samitit të Podgoricës, kryeministri shqiptar mësohet se ka zhvilluar një ndër takimet më të rëndësishme me një drejtues shumë të lartë të administratës së Donald Trumpit; takim që duket ka ecur në suazat e parashikuara prej Zv.presidentit amerikan Mike Pence, që ka sjellë edhe telefonatën e para dy ditëve të Sekretarit Amerikan të Shtetit, Rex Tillerson dhe kryeministrit shqiptar.
Është kjo telefonatë që ka vulosur edhe institucionalisht qëndrimin e administratës së re të SHBA ndaj Shqipërisë dhe natyrisht shqiptarëve në rajon.
Po ta shohësh me vëmendje këtë skemë, është e njëjta që ndodhi në vitin 2015 kur qevera shqiptare dha “OK” për sjelljen në Tiranë të të gjithë opozitarëve iranianë të Liberty Camp në Ashraf të Bagdadit, dhe më pas solli në kryeqytetin shqiptar, Sekretarin e Shtetit të asaj kohe John Kerry.
Për një vend të vogël si Shqipëria, protokolli thuajse homolog i kryeministrit është Sekretari i Shtetit.
Në vitin 2012, ishte Sekretarja e Shtetit, Hillary Clinton që priti kryeministrin Sali Berisha në Uashington.
Por po ta shohësh me kujdes, kjo skemë e bisedimeve intensive Tiranë-Uashington, i ngjan kontaktit që ndodhi në vitin 2013 kur Edi Ramës ju propozua që të shkatërrohen në Shqipëri armët kimike të Bashar Al Asadit, por që kryeministri shqiptar nuk e pranoi, si pasojë e një presioni të madh më shumë politik se popullor, nga aleati i tij Ilir Meta, por edhe opozita e Sali Berishës dhe Lulzim Bashës.
Pikërisht “JO”-ja e Ramës shkaktoi një problem mes marrëdhënieve me SHBA që më pas u përqëndruan tek Reforma në Drejtësi.
Por çfarë u fol realisht në Podgoricë që sollën një intensifikim kontaktesh me qeverinë e re që pritet të krijohet dhe ka bërë gati një tur të nivelit të lartë në Uashington?
Burime diplomatike bëjnë të ditur se është folur natyrisht për një rol të zgjeruar të Tiranës në lidhje me kursin që ka marrë Serbia për të mbyllur çështjen e Kosovës dhe gjithashtu për emrin e ri të Maqedonisë, që sipas mediave ruse, edhe kryeministtri shqiptar ka dhënë një version të tijin.
Por çështja kryesore ka pasur të bëjë me muxhahidinët iranianë që ndodhen në Shqipëri që prej vitit 2014.
Tashmë Tirana është kthyer në një qendër të politikës antagoniste të opozitarëve muxhahidinë dhe regjimit të Teheranit, i cili ka zhvendosur në kryeqytetin e Shqipërisë të gjithë personelin e shërbimit sekret që e ka trajnuar dhe përgatitur për të kundërshtuar politikën e muxhahidinëve.
Irani ka larguar të gjithë stafin e diplomatëve përfshirë ambasadorin, duke e zëvendësuar me zyrtarë të shërbimit sekret.
Siç mësohet, një aktivitet shumë i ngjeshur po zhvillohet nga ana e shërbimit sekret iranian, i cili është totalisht i vëzhguar dhe ka një kusht të fortë nga Tirana: që të mos krijojë trazira apo përfshijë shërbimet sekrete ruse si aleatë të tyre, pasi kjo ddo të thonte dëbim i këtyre diplomatëve.
Por tani Uashingtoni i ka kërkuar Tiranës një rol të ri, i cili duket shumë misterioz, pasi nuk ka asnjë transparencë.
Si SHBA ashtu edhe Shqipëria e mohojnë këtë çështje, siç bënë edhe në vitin 2015, kur tesheshi.com ishte i pari që bëri të ditur se John Kerry vjen në Tiranë për muxhahidinët, por që më 14 shkurt, ditën e vizitës së Sekretarit Amerikan të Shtetut u mohua si nga Rama ashtu edhe nga Kerry.
Nuk kaloi as një vit kur kjo u pranua hapur nga Sekretari Amerikan i Shtetit në një letër drejtuar krerëve të opozitës iraniane.
Në qendrën e tyre në Tiranë, pranë Vorës situata ka ndryshuar totalisht. Një qendër e stërmadhe punë është kthyer në shtabin politik të një ndërmarrje që pritet të nisë luftën e fortë ndaj regjimit aktual në Teheran.
Por sa do ta rrezikojë Shqipërinë një involvim në luftën politike të brendshme në Iran? A do ta dëmtojë kjo gjendjen aktuale të marrëdhënieve të Shqipërisë me një pjesë të botës muslimane, kryesisht iranianëve shiitë por edhe aleatë të tyre në rajon si Siria e Asadit apo të tjerë?
Fakt është që Shqipëria ka më shumë se një vit që është përfshirë fort në koalicionin anti-Iran dhe Siri.
Qeveria Shqiptare, me kërkesën e administratës Trump ka armatosur rebelët kurdë në Siri që po luftojnë ISIS-in por edhe regjimin e Asadit. Prej mbi 12 muajsh drejt kufirin sirian dërgohen ngarkesa me predha artilerie dhe raketa katjushka për rebelët kurdë.
Ditmir Bushati, ministri i Jashtëm shqiptar, menjëherë pas vizitës në Teheran është pritur nga njeriu më i rëndësishëm i Shtëpisë së Bardhë, Herbert Raymond McMaster, si dhe nga numri dy i Departamentit të Shtetit.
Që tani ky lineim i Tiranës si qendër e luftës politike të brendshme në Iran ka shkaktuar stuhinë propagandsistike të regjimit të Teheranit, nëpërmjet shkrimeve apo pamfleteve.
Efekti i parë ka ardhur pikërisht në qendrën e muxhahidinëve në Vorë. Ata kanë urdhëruar pjesëtarët e komunitetit të tyre që të mos dalin më në ajër të hapur por të rrinë brenda. “Jemi në gatishmëri të lartë”, u ka ardhur urdhëri. Po ç’pritet të ndodhë? /tesheshi.com/
