Pranvera që po vjen me dimër!

Disa vende evropiane, si Belgjika, Gjermania, Holanda dhe Spanja, kanë gdhirë të premten të mbuluar nga bora e prillit, ndërsa meteorologët kanë paralajmëruar për kushte të pafavorshme atmosferike, raporton AA.

Belgjika, e cila prej javësh dominohet nga moti pranveror, u zgjua mëngjesin e sotëm nën një batanije të bardhë.

Meteorologët në atë vend dhanë paralajmërim të verdhë për shkak të motit të keq në disa rajone dhe paralajmëruan vazhdimin e reshjeve të borës.

Holanda prej dy ditësh është nën ndikimin e reshjeve të borës, të cilat kanë shkaktuar bllokime me kilometra në autostrada rreth qyteteve të mëdha. Një paralajmërim i verdhë është lëshuar në tetë provinca.

Në Gjermani, në ditën e parë të prillit, borë ka rënë në pjesët më të larta të vendit, si dhe në rajonin e Vestfalisë, në perëndim.

Moti në Zvicër ka qenë më i ftohtë që nga fillimi i javës, gjë që ka shkaktuar borë më 1 prill në zonat malore dhe rreth liqenit të Gjenevës.

Spanja gjithashtu hyri në prill me temperaturat më të ulëta të matura në 20 vjet. Autoritetet lokale kanë paralajmëruar publikun për borë në veri dhe akull në pjesë të tjera të vendit.

Gjithashtu thuhet se do të ketë ndërprerje në qarkullimin detar përgjatë bregdetit të Mesdheut. /tesheshi.com/