Prania e përfaqësuesve të Kosovës në samitin për luftën kundër terrorizmit që drejtohej nga presidenti amerikan, Barack Obama ka bërë që serbët dhe rusët të protestojnë pranë OKB-së. Mediat në Beograd bëjnë të ditur se misioni serb, I konsultuar nga ministri I Jashtëm Ivica Daçiq, i ka dërguar notë proteste OKB-së për shkak të pranisë së përfaqësuesve të Kosovës në konferencën për luftën kundër terrorizmit.
Konferenca kundër terrorizmit ishte pjesë e organizimit të OKB-së, e u drejtua nga Obama. Në këtë konferencë kanë qenë të pranishëm kryeministri Isa Mustafa, ministri i Jashtëm, Hashim Thaçi, dhe ministri i Brendshëm, Skënder Hyseni.
I dërguari i Rusisë në OKB, Vitaly Churkin, ka reaguar po ashtu ndaj pranisë së përfaqësuesve kosovarë. “Ata janë ulur në sallë së bashku me përfaqësuesit e vendeve anëtare të OKB-së. Kjo nuk është në rregull. Kjo është kundër rregullave të OKB-së”, tha Churkin.
Serbët nuk humbasin asnjë rast për të protestuar ndaj pjesëmarrjes së delegacioneve kosovare në organizime të ndryshme ndërkombëtare, edhe pse tashmë pjesëmarrja e Kosovës në këto forume është bërë fakt. /tesheshi.com/
