Pjesët e fundit të territorit të kontrolluar nga kryengritësit në lindje të Halepit po bien njëra pas tjetrës në duart e forcave qeveritare siriane. Vetëm gjatë ditës së djeshme, kryengritësit u tërhoqën nga më së paku gjashtë lagje, lajmëron Al Jazeera.
Banorët e Halepit i kanë rrëfyer këtij rrjeti mediatik se forcat qeveritare kanë ekzekutuar dhjetëra civilë për lidhje me kryengritësit.
Observatori Sirian për të Drejtat e Njeriut, informoi për më së paku 60 të vrarë vetëm të hënën nga bombardimet apo nga zjarri i armëve.
“Beteja e Halepit ka arritur në fundin e saj. Eshtë vetëm çështje e pak kohe, jo më shumë,… është një rrënim i plotë,” deklaroi Rami Abdel Rahman-i, drejtuesi i Observatorit.
Sekretari i përgjithshëm në ikje i OKB-së, Ban Ki-Moon, ka shprehur shqetësimin e madh për mizoritë e kryera në terren ndaj civilëve.
Në një deklaratë është kërkuar prej tij obligimi i të gjitha palëve për t’i mbrojtur civilët e për t’iu përmbajtur ligjeve ndërkombëtare humanitare dhe atyre të të drejtave të njeriut.
Këshilltari humanitar i OKB-së për Sirinë, Jan Egeland, tha se qeveria siriane dhe ruse duhet të bëhen përgjegjëse për çdo mizori të kryer nga milicitë besnike të Esadit. /tesheshi.com/
