Dy ditë para protestës së opozitës, duke parë dhe atë çfarë ndodhi në parlament, ka reaguar ambasada e SHBA në Tiranë, duke bërë thirrje për shmangie të dhunës më datë 16 shkurt.
“E drejta e qytetarëve për t’u mbledhur, për t’i bërë kërkesa qeverisë dhe për të protestuar për ndryshim pozitiv janë simbole të një shoqërie demokratike të lirë dhe të shëndetshme. Është një e drejtë që ushtrohet shpesh në Shtetet e Bashkuara. Megjithatë, kjo e drejtë duhet ushtruar paqësisht. Dhuna kundër njerëzve ose pronës është e papranueshme.
Ne iu bëjmë thirrje të gjithë atyre që janë përfshirë në protestën e së shtunës, dhe të gjithë udhëheqësve politikë shqiptarë, të refuzojnë dhunën dhe të sigurohen që protestat të zhvillohen paqësisht dhe në mënyrë konstruktive” mbyllet deklarata e ambasadës së SHBA.
Të njëjtin apel kanë lëshuar dhe përfaqësia e BE-së në Tiranë si dhe ambasada britanike. /tesheshi.com/
