Të njohur si mbështetësit më të zjarrtë të kombëtares shqiptare, “Tifozët Kuq e Zi” kanë marrë një vendim befasues . Përmes një deklarate në rrjetin social facebook, ata njoftojnë se nuk do të bëjnë më tifo për ekipin kombëtar. Sipas njoftimit të tyre, shkak është bërë terrori që ata përjetuan në ndeshjen e pak ditëve më parë me Izraelin, ku autoritetet e rendit morën masa ekstremisht të rrepta, për sigurinë e të pranishmëve në stadium.
“Ajo që ndodhi në ndeshjen Shqipëri-Izrael, nuk kishte të bënte asgjë me lojën e bukur të futbollit. Atë ditë, tifozët shqiptarë prezent në stadium (dhe jo vetëm) ishin viktimë e terrorit shtetëror. Andaj, përshkrimi apo prezantimi i çfarëdo fakti, nuk mund ta përshkruajë terrorin që tifozët shqiptarë përjetuan nga policia e shtetit . Ne jemi tifozë, që e duam këtë Kombëtare dhe këtë Shqipëri. Për arsyen e lartpërmendur, “Tifozat Kuq e Zi”, janë të detyruar të marrin vendim për bojkotimin e të gjitha ndeshjeve të radhës brenda, përfshirë këtu edhe ndeshjen me Lihtenshtajnin. Kombëtaren do ta ndjekim vetëm në transferta, atje ku na respektojnë”, shkruajnë përfaqësuesit e këtij grupi tifozësh.
Duke bërë ironi, ata i janë drejtuar policisë së shtetit me një apel: “Me këtë rast, ftojmë policinë e shtetit shqiptar, që të pajisur me kallashnikovë dhe me armë tjera, të bëjë tifozin në tribunë. Për veprimet dhe format e organizimeve tona të radhës, do të ju njoftojmë me kohë. Me sinqeritet, Tifozat Kuq e Zi”./tesheshi.com
