Ministri i Jashtëm i Maqedonisë thotë se emigrantët në kufirin me Greqinë nuk janë keqtrajtuar dhe se mbyllja e kufirit ishte e detyruar për shkak të numrit të madh të njerëzve që kalonin përditë.
Në një deklaratë për BBC-në, Nikola Popovski këmbëngul se refugjatët nuk janë keqtrajtuar edhe pse u përdor gazi lotsjellës. Ai tha se në Maqedoni mbërrinin përpara mbylljes së kufirit, 3500 njerëz në bazë ditore.
Refugjatët, shumica e të cilëve janë refugjatë lufte nga Siria, kërkojnë kalimin në Maqedoni për të vijuar më pas rrugëtimin drejt shteteve të Bashkimit Europian.
Amnesty International ka deklaruar për incidentete në kufi se ata ishin trajtuar më shumë si protestues se sa si refugjatë. Maqedonia ka deklaruar gjendjen e jashtëzakonshme për të përballuar situatën.
“Në ditët e fundit ka pasur një rritje dramatike të fluksit të emigrantëve dhe numri ka arritur në 3000 apo 3500 në ditë, dhe kjo nuk është diçka e zakonshme për një shtet me dy milionë banorë. Ne duhet të riforcojmë kontrollin e hyrjes së paligjshme në territorin e Maqedonisë”, tha Poposki.
Medecins Sans Frontieres ka bërë të ditur se 10 persona janë plagosur nga gazi lotsjellës i trupave maqedone në fshatin Edomeni, afër kufirit me Greqinë. /tesheshi.com/
