Zëvendëskryeministri i parë dhe Ministri i Jashtëm i Kosovës, Hashim Thaçi, nuk po nderohet vetëm nga politikanët në Kroaci, por edhe nga shoqatat e luftëtarëve. Me motivacionin për kontributin e tij të jashtëzakonshëm në çlirimin e Kosovës, shpalljen e pavarësisë, formimin e institucioneve demokratike dhe politikën paqësore në rajon, Thaçin me titullin më të lartë “Mirënjohje e Artë”, e ka dekoruar edhe Shoqata e Luftëtarëve Shqiptarë të Kroacisë.
Gjatë takimit me luftëtarët shqiptarë dhe kryetarin e Shoqatës së Luftëtarëve Shqiptarë në Kroaci, Esat Çollakun, zëvendëskryeministri Thaçi ka thënë se Kroacia dhe Kosova kanë kultivuar gjithnjë marrëdhënie të mira.
“Jam i privilegjuar të jem me njerëzit që dhanë shumë për çlirimin e Kroacisë, por edhe për çlirimin e Kosovës dhe promovimin e afirmimin e Shqipërisë dhe të shqiptarëve kudo që jetojnë. Keni qëndruar të bashkuar, pa dallime, në shërbim të afirmimit të shqiptarëve. Kosova është shtet i pakthyeshëm dhe në rrugë të sigurt euroatlantike”, tha zëvendëskryeministri Thaçi.
Kryetari i Shoqatës së Luftëtarëve Shqiptarë në Kroaci, Esat Çollaku, duke arsyetuar dekoratën për Thaçin, tha se lideri politik i UÇK-së, Hashim Thaçi, kishte guximin dhe vizionin që askush nuk e kishte.
Duke luftuar në Kroaci, sipas Çollakut, ata kanë luftuar edhe për Kosovën. Në luftën e Kroacisë, sipas tij, komuniteti shqiptar kishte mbi 3000 vullnetarë./tesheshi.com/
