Në ditën e pestë të fushatës zgjedhore politika kosovare është zgjuar me një mesazh ngushëllimi e solidariteti pas sulmeve që ndodhën mbrëmë në londër ku humbën jetën gjashtë persona dhe afër 50 të tjerë u plagosën.
Presidenti, kryeministri në detyrë, kryetarë të partive e kandidat për kryeministër kanë shprehur ngushëllimet për Mbretërinë e Bashkuar dhe familjarët e viktimave.
Presidenti Thaçi, në rrjetin social Twitter ka nshkruar: “Një sulm shokues në Londër. Lutjet tona janë familjet e viktimave. Mbretëria e Bashkuar është një shtyllë fundamentale e lirisë njerëzor – prandaj është një cak i terroristëve të ulët çnjerëzorë”.
Kryeministri në detyrë Mustafa në mesazhin drejtuar kryeministres britanike, Theresa May ka shkruar: “Jemi thellësisht të pikëlluar nga sulmet terroriste në Londër. Mbretëria e Bashkuar është djep i lirisë dhe demokracisë, vlera të cilat nuk mund të cenohen nga askush. Populli dhe Qeveria e Kosovës janë me ju!”.
Edhe kreu i PDK-së, Kadri Veseli, ka ngushëlluar familjarët e viktimave të sulmit në Londër.
“Sulmi i Londrës do të thotë që ne të gjithë jemi sulmuar. Ngushëllime familjeve të viktimave dhe njerëzve të Mbretërisë së Bashkuar. Kosova qëndron në mënyrë të vendosur përkrah aleatëve tanë”, ka shkruar Veseli.
Edhe i nominuari për kryeministër nga koalicioni PDK-AAK-Nisma, Ramush Haradinaj, ka shkruar se është “thellësisht i prekur nga sulmet makabre në Londër dhe me humbjen e jetëve të njerëzve të pafajshëm”.
“Lutjet tona sot janë me familjet e viktimave dhe popullin britanik. Asnjëherë nuk duhet dhe nuk do të dorëzohemi para akteve të tilla. Rreshtohemi me aleatët tanë në luftën e pakompromis kundër terrorizmit”, ka shkruar Haradinaj.
Edhe kandidati për kryeministër nga Vetëvendosje, Albin Kurti është shprehur i tronditur nga seria e sulmeve në Londër, teksa i ka shprehur ngushëllimet e tij familjarëve të viktimave.
“Jemi të gjithë të tronditur nga sulmi i djeshëm terrorist në Londër, sulmi i dytë brenda pak kohësh në Mbretërinë e Bashkuar. Ngushëllimet dhe solidariteti ynë shkon për familjarët e viktimave, për të plagosurit e për gjithë qytetarët britanikë, si dhe për institucionet e për ambasadorin O’Connell. Britania është partner i rëndësishëm historik e strategjik i Kosovës dhe i shqiptarëve, vend që na ka ndihmuar ushtarakisht e politikisht, si dhe vend ku jetojnë një numër i konsiderueshëm shqiptarësh mërgimtarë. Ndaj në këto çaste të vështira është e rëndësishme t’i ofrojmë mbështetjen tonë, sado modeste”, ka shkruar Kurti në profilin e tij në Facebook. /tesheshi.com/
