Policia ka firmosur zyrtarisht padi penale për të paktën katër deputetë të PD-së dhe disa organizatorë të protestave që çuan në bllokimin e rrugëve nacionale në Tiranë dhe në katër rrethe të tjera të vendit.
Siç bën të ditur me anë të një deklarata të saj, Policia thekson se janë plotësuar paditë përkatëse, por nuk thotë se për sa dhe për kë. Por nëse bëhet fjalë për drejtuesit që ishin caktuar në terren ata janë: Edi Paloka në rrethrrotullimin e Shqiponjës, Flamur Noka te Pallati me Shigjeta, Aldo Mumçi në Milot dhe Luciano Boçi në Elbasan.
“Protesta e sotme e opozitës, u organizua kryesisht nga deputetë dhe funksionarë të Partisë Demokratike në kundërshtim me ligjin nr. 8773, datë 23.04.2001 “Për tubimet”, edhe pse u lajmëruan me shkresë dhe publikisht nga autoritetet ligjore përkatëse.
Në bazë e në zbatim të ligjit, strukturat e Policisë pas fiksimit dhe mbikëqyrjes profesionale të protestave të paligjshme, kanë përpiluar materialet procedurale, për organizatoret dhe shkelësit e ligjit dhe materialet do të referohen për fillimin e çështjes penale në Prokuroritë e rretheve gjyqësore, respektive, Tiranë, Kurbin, Elbasan e Lushnjë”, thuhet në deklaratë.
Policia thekson se protesta ishte shkelje e ligjit dhe e argumenton:
“Pretendimi i organizatorëve të kësaj veprimtarie të paligjshme, se ata thjesht e lajmërojnë Policinë dhe e bëjnë tubimin edhe aty ku kërcënohet siguria e qytetarëve apo pengohet seriozisht qarkullimi i njerëzve e mallrave, është i papranueshëm ligjërisht”, thuhet më tej. /tesheshi.com/
