Policia shkencore maqedonase nuk ka publikuar asnjë raport mbi të vrarët në Lagjen e Trimave në Kumanovë, ndërkohë që dihet vetëm identiteti i 3 personave që janë: Mirsad Ndrecaj dhe Beg Rizaj nga Kosova dhe Nusret Kaloshi nga Shkupi.
Organet hetimore kanë theksuar se po vazhdon identifikimi i tyre dhe se për këtë po bashkëpunojnë edhe me autoritetet e Kosovës.
Ardian Arifaj, këshillitari politik i ministrit të jashtëm të Kosovës, Hashim Thaçi ka theksuar se ende nuk kanë marrë asnjë konfirmim zyrtar nga autoritetet e Maqedonisë për shtetas të Kosovës të vrarë apo të plagosur gjatë konfliktit të armatosur në Kumanovë.
“Zyrtarisht nuk kemi asnjë konfirmim për viktima nga Kosova në Kumanovë të Maqedonisë. Normalisht që jemi të gatshëm që veprojmë, të reagojmë. Kemi kontaktuar edhe autoritetet maqedonase dhe i kemi njoftuar se jemi të gatshëm për çdo rast të veprojmë në bazë të protokolleve dhe procedurave të parapara me ligj”, shtoi Arifaj.
Gazetari Milaim Zeka i cili ka qëndruar në Kumanovë ka shprehur dyshime se në përleshjen e armatosur në Kosovë janë vrarë vetëm 3 veta, ndërsa të tjerët janë emigrantë ilegal sirian dhe afgan.
Këto zëra kanë shtuar dilema se sa mund të jetë numri i personave të vrarë në Kumanovë, dhe se përse po vonohet procesi i identifikimit nga autoritetet maqedonase.
Ministria e Brendshme dhe Prokuroria publike informuan se po vazhdon identifikimi i viktimave të tjera nga radhët e grupit të armatosur. Sipas autoriteteve, në përleshjet e së shtunës janë vrarë 14 pjesëtarë të grupit të armatosur, ndërsa në anën e policisë u vranë 8 pjesëtarë të forcave speciale dhe 37 të plagosur.
Nga personat e vrarë të identifikuar janë shtetasit e Kosovës Mirsad Ndrecaj dhe Beg Rizaj si dhe shtetasi i Maqedonisë Nusret Kaloshi. Ndrecaj (date lindja 17.06.1976) i njohur me nofkën “Komandant NATO” i ish-Ushtrisë Çlirimtare Kombëtare (UÇK) në Maqedoni konsiderohet si udhëheqës i grupit të armatosur që kishte ndërhyrë në lagjen urbane në Kumanovë, të banuar me shqiptarë etnik, ndërsa edhe Beg Rizaj (25.12.1977) gjithashtu njihet si ish-pjesëmarrës dhe ish-komandant i UÇK-së në luftën e Kosovës të vitit 1999 dhe konfliktin e vitit 2001 në Maqedoni. Ndërsa, Nusret Kaloshi 40 vjeçar nga Shkupi ka qenë vetëm përkrahës i këtij grupi, i cili u vra gjatë përleshjeve.
