Policia e Kosovës arrestoi Sulejman Osmanin nga fshati Brezë, i dyshuar për ngjarjet në Kumanovë dhe i cili arriti t’i ikë policisë në Karadakun e Shkupit.
Sipas policisë, Osmani më shumë se dy muaj ishte arratisur në Kosovë dhe se policia ishte vënë në kërkim të tij, pas një fletëarresti të lëshuar nga Policia e Maqedonisë, informon Lajmpress.
Ai më 9 maj bashkë me njësitet speciale kishte shkuar në afërsi të Brezës, ku kishte pohuar se atje kishin fshehur armatimin si pjesëtarë të grupit të armatosur. Mirëpo gjatë kërkimeve të armëve, ai ka arritur që të arratisej nga policia speciale.
Lidhur me këtë rast, u ngrit procedurë kundër zyrtarëve të policisë të cilëve u iki. Në një bisedë të zhvilluar pas arratisjes me Xhezair Shaqirin-Komandant Hoxhën, Osmani pat thënë se udhëheqësit e grupit të armatosur në Kumanovë kanë marrë garanci prej kryetarit të BDI-së, Ali Ahmeti, se nëse dorëzohen do t’i presë Artan Grubi dhe OSBE-ja, mirëpo më pas janë pritur nga policët maqedonas.
