Polarizimi politik dhe dezinformimi në internet kërcënojnë programet e vaksinimit në të gjithë botën, me besimin e publikut që ndryshon shumë midis vendeve, ka treguar një studim global i kryer në 149 vende.
Rezultatet e studimit, botuar në revistën mjekësore The Lancet, bazohen në të dhëna nga më shumë se 284,000 të rritur të pyetur nëse i konsiderojnë vaksinat të rëndësishme, të sigurta dhe efektive, raportoi Reuters.
Studimi zbuloi se skepticizmi në lidhje me sigurinë e vaksinave po rritet së bashku me paqëndrueshmërinë politike dhe ekstremizmin fetar.
“Eshtë thelbësore për kërcënimet e sëmundjeve të reja, të tilla si pandemia COVID-19, për të monitoruar rregullisht qëndrimet e publikut”, tha Heidi Larson, një profesore në Shkollën e Higjienës dhe Mjekësisë Tropikale në Londër e cila drejtoi kërkimin.
“Perceptimet e vaksinave janë shumë më të paqëndrueshme sesa më parë. Në përgjithësi, ka shumë besim tek vaksinat në botë. Por mos e merrni këtë si të mirëqenë. Besimi rritet e ulet, është shumë i ndryshueshëm.”
Besimi në vaksinat në Evropë është i ulët
Rezultatet e studimit tregojnë se besimi te vaksinat në Evropë është i ulët krahasuar me rajonet e tjera të botës, me një pjesëmarrje që varion nga 19 përqind në Lituani në 66 përqind në Finlandë. Sidoqoftë, besimi i publikut në vaksinat është rritur në disa vende evropiane që nga viti 2015, duke përfshirë Francën, Italinë, Irlandën dhe Britaninë.
Iraku, Liberia dhe Senegali kishin pjesën më të madhe të të anketuarve në 2019 të cilët ranë dakord se vaksinat janë të rëndësishme.
Studimi gjeti gjashtë vende në të cilat besimi në vaksinë ka rënë ndjeshëm që nga viti 2015. Në Indonezi, Pakistan, Serbi, Azerbajxhan, Afganistan dhe Nigeri, përqindja e njerëzve që nuk pajtohen plotësisht se vaksinat janë të sigurta është rritur ndjeshëm. Sipas kreut të studimit, kjo ka të bëjë me trendet e paqëndrueshmërisë politike dhe ekstremizmit fetar në ato vende.
Në disa vende, ekziston një polarizim më i madh i ndjenjave që shkojnë në ekstreme – ose ata nuk pajtohen plotësisht me vaksinimin ose pajtohen plotësisht. /tesheshi.com/
