E hëna po ashtu ka qenë e mbushur me ndeshje për kualifikueset e botërorit Rusi 2018, siç ka ngjarë që prej së enjtes së shkuar.
Takimi më spikatës ka qenë ai mes Holandës dhe Francës, dy skuadrave të grupit A të kualifikueseve.
Në Amsterdam kanë fituar francezët falë golit të një lojtari fort të kritikuar kohët e fundit për paraqitjet e tij. Franca fitoi 0-1, me një gol të Pogba-së, që gjuajti fort nga jashtë zonës në minutën e 30-të, për ta dërguar topin në rrjetë.
Franca mori kryesimin e grupit A, bashkëshoqëruar me Suedinë, me nga 7 pikë secila.
Dy fitoret më të thella të mbrëmjes qenë ato të Portugalisë dhe Belgjikës, veçse ndaj përfaqësueseve më tepër se modeste. Portugalia fitoi 0-6 ndaj Ishujve Faroe, dhe po 0-6 fitoi dhe Belgjika ndaj Gjibraltarit.
Suedia e mposhti pastër, 3-0, Bullgarinë, siç bëri Bosnjë-Hercegovina ndaj Qipros, duke fituar 2-0.
Zvicra kaloi ngushtësisht Andorrën, duke u mjaftuar me një fitore 1-2. Në transfertë pati dy fitore 0-2, Hungaria ndaj Letonisë, si dhe Greqia ndaj Estonisë.
Barazimi i vetëm i mbrëmjes ishte ai mes Bjellorusisë dhe Luksemburgut; një takim i mbyllur 1-1. /tesheshi.com/
