Podemos u rendit e treta në zgjedhjet rajonale të zhvilluara të dielën në Andaluzi, duke zënë vend për herë të parë në parlamentin rajonal. Partia e majtë spanjolle ka marrë 14.8 për qind të votave në rajonin jugor të vendit.
Votimi në Andaluzi, në rajonin ku papunësia është 34 për qind, tregoi shenjat e pakënaqësisë ndaj dy partive kryesore.
Partia Socialiste, në pushtet në Andaluzi që nga 1982-shi, siguroi 35.4 për qind të votave. Partia Popullore, e cila drejton vendin, u rendit e dyta, me 26.7 për qind, një rënie e ndjeshme krahasuar me rezultatin e zgjedhjeve të shkuara në vitin 2012, kur pati fituar 40 për qind të votave.
Dy partitë i kanë lënë radhën njëra-tjetrës që nga vitet 1980 në qeverisjen e Spanjës, por rritja e Podemos-it ka sjellë shqetësim tek to, ndërsa në nëntor pritet të ketë zgjedhje të përgjithshme.
Pablo Iglesias, udhëheqësi i Podemos-it, e gjeti të udhës të uronte në Twitter, “Faleminderit Andaluzi… faleminderit për marrjen e këtij hapi të parë, ne do të bëjmë përpara.”
Andaluzia është një nga rajonet më të varfra të vendit, dhe nga më të goditurat nga kriza ekonomike e vitit 2008.
Asnjë prej partive nuk siguroi shumicën në zgjedhjet për parlamentin rajonal. Socialistët kanë siguruar 47 vende, tetë më pak nga ç’duhen për shumicën, e po kaq më pak nga ç’patën fituar tre vite të shkuara. Partia Popullore, e cila pati siguruar 50 vende në 2012-n, ra në 33 vende. Podemos ka siguruar 15 vende, Qytetarët kanë marrë 9 vende, dhe pesë vende kanë shkuar për të Majtën e Bashkuar. /tesheshi.com/
