Pas AKR-së së Behgjet Pacollit që e sigurtë do të shkon drejt koalicionit PAN, lehtësisht një rrugë të tillë mund të marrë edhe partia Alternativa.
Drejtues të kësaj partie, tashmë kanë paraqitur pakënaqësitë e para ndaj partnerit të madh LDK-së së Isa Mustafës, pasi kjo e fundit ka vendosur të garojë e vetme në zgjedhjet lokale.
Deputetja dhe kandidatja nga “Alternativa” për kryetare të Gjakovës, Mimoza Kusari-Lila ka deklaruar se koalicioni LAA ka pasur në diskutim një marrëveshje, për koordinimin e mbështetjes së kandidaturave për zgjedhjet komunale të 22 tetorit, mirëpo në momentin e fundit LDK ka vepruar si subjekt.
“Është e vërtetë që ne me LDK-në kemi pasur një bisedë. Të gjithë kemi qenë të vetëdijshëm që afatet për koalicione parazgjedhore për koalicione për zgjedhjet lokale kanë kaluar, ndërsa ne jemi marrë me atë se çfarë po ndodhte në Parlament. Por, kemi pasur një marrëveshje në diskutim që të kemi të paktën kandidatura të përbashkëta.
Përderisa këto nuk u finalizuan, në fakt shkuan edhe më larg, si përshembull në Gjakovë, ku LDK-ja që insistonte të kemi një kandidat të përbashkët, në fakt të mbështeste kandidaturën time, në momentin e fundit vendosi një kandidat tjetër.
Edhe me AKR-në ka pasur diskutime, por nuk ka pasur finalizim deri në fund. Kjo tregon se partitë bëjnë atë që është në interes të tyre, por secili duhet t´i mbajë në ndërgjegje e tij veprimet dhe të shohim se cili do të jetë rezultati i zgjedhjeve lokale”, kadeklaruar Kusari-Lila në një intervistë për emisionin “Alo Mirëmëngjesi’ të Radio Dukagjinit.
Ajo më tej tha se të tilla veprime nuk rrezikojnë garën e saj për Gjakovën, por dëmtojnë kredibilitetin e bashkëpunimit.
“Këtë veprim ne nuk e konsiderojmë se na rrezikon, por dëmton kredibilitetin e bashkëpunimit”, ka shtuar Kusari –Lila. /tesheshi.com/
