Mario Balotelli dukej futbollisti më i mbaruar, më i pashpresë, gjatë verës, në fushatën e transferimeve. Liverpuli kërkonte ta hiqte qafe me çdo kusht, ndërsa asnjë ekip nuk ishte i gatshëm të bënte qoftë dhe një bamirësi e t’i bënte pak vend një prej yjeve të futbollit italian jo shumë vite më parë.
I lënë jashtë përfaqësueses italiane, me vetëm një gol të shënuar sezonin e shkuar në kampionatin italian, karriera e 26-vjeçarit problematik dukej të qe në fund.
Nuk dihet ende nëse ai apo dikush tjetër zgjodhi futbollin francez si një mundësi të fundit, por fakt është se vajtja e Balotelli-t te Nisë ka qenë një zgjedhje e përkryer, së paku deri tani.
Shifrat flasin vetë: katër gola ka shënuar Balotelli në dy takime, Nisë kryeson kampionatin francez, e po ashtu është ekipi i vetëm që nuk ka pësuar humbje.
Dy golat e parë të Balotelli-t erdhën në takimin me Olimpikun e Marsejës, dhjetë ditë më parë. Më 11 shtator, Balotelli bëhet protagonist me dy golat e tij, pasi Nisa fiton 3-2 me Marsejën.
Në një tjetër takim kyç, një natë më herët, më 21 shtator, Nisa mposht pastër Monakon, dhe dy prej golave shënohen po nga Balotelli.
Nisa e sheh veten në krye të kampionatit francez pas gjashtë javësh, me 14 pikë, një më shumë se PSG-ja dhe Monako, që mbajnë respektivisht vendin e dytë dhe të tretë.
Njëherë e një kohë, Balotelli luante me Interin, me Mançester Sitin, me Milanin e Liverpulin. Tani aktivizohet me Nisën, larg zhurmës, larg fokusit tek ai. A po rilind Balotelli? Gjer më tash, edhe pse ende shpejt, beteja është e fituar për të! /tesheshi.com/
